ମୁମ୍ବାଇ ପୋଲିସର ଅସହିଷ୍ଣୁତା: ୧୦୦୦ ସାମ୍ବାଦିକଙ୍କ ନାମରେ ଏତଲା

ମୁମ୍ବାଇ, (ବଡ଼ ଖବର ବ୍ୟୁରୋ) : ସୀମା ଟପୁଛି ମୁମ୍ବାଇ ପୋଲିସର ଅସହିଷ୍ଣୁତା । ରିପବ୍ଲିକ ଟିଭି ସହ ବିବାଦ କାରଣରୁ ଏହାର ୧୦୦୦ ସାମ୍ବାଦିକଙ୍କ ନାମରେ ଏତଲା ହୋଇଛି । ମୁମ୍ବାଇ ପୋଲିସ ଓ ରିପବ୍ଲିକ ଟିଭି ମଧ୍ୟରେ ବିବାଦ ଏବେ ଚରମ ସୀମାରେ ପହଞ୍ଚିଛି । ପାଲଘର ସାଧୁଙ୍କୁ ହତ୍ୟା ଏବଂ ସୁଶାନ୍ତ ସିଂ ରାଜପୁତ ହତ୍ୟାକାଣ୍ଡରେ ମୁମ୍ବାଇ ପୋଲିସକୁ ଘେରିଥିଲା ରିପବ୍ଲିକ ଟିଭି । ଏହି ଦୁଇ ମାମଲାରେ ରିପବ୍ଲିକ ଭାରତ ସିଧାସଳଖ ମୁମ୍ବାଇ ସରକାର ସହ ମୁମ୍ବାଇ ପୋଲିସ କମିଶନରଙ୍କୁ ଟାର୍ଗେଟ କରିଥିଲା । ଯେଉଁଠୁ ବିବାଦର ସୂତ୍ରପାତ ହୋଇଥିଲା । ରିପବ୍ଲିକ ଭାରତର ସାମ୍ବାଦିକମାନେ ବାରମ୍ବାର ମୁମ୍ବାଇ ପୋଲିସ ଓ ସରକାରଙ୍କୁ ଟାର୍ଗେଟ କରିିଥିଲେ । ବିବାଦ ଏତେ ତୀବ୍ରତର ହୋଇଥିଲା ଯେ ମୁମ୍ବାଇ ପୋଲିସ ରିପବ୍ଲିକ ଭାରତର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀଙ୍କୁ ବାରମ୍ବାର ଜେରା କରିବା ସହ କିଛି ସାମ୍ବାଦିକଙ୍କୁ ମଧ୍ୟ ଗିରଫ କରିଥିଲା । ଆଜି ରିପବ୍ଲିକ ଭାରତର ୧୦୦୦ କର୍ମଚାରୀଙ୍କ ନାମରେ ଏତଲା କରିଛି ମୁମ୍ବାଇ ପୋଲିସ । ଟିଆରପି ସ୍କାମ ମାମଲାରେ ମୁମ୍ବାଇ ପୋଲିସ ଏହି ମାମଲା ରୁଜୁ କରିଛି ବୋଲି କହିଛନ୍ତି ମୁମ୍ବାଇ ପୋଲିସ କମିଶନର ପରମବୀର ସିଂ । ରିପବ୍ଲିକ ଭାରତର କିଛି ବରିଷ୍ଠ ସାମ୍ବାଦିକଙ୍କ ନାମରେ ଅପରାଧିକ ମାମଲା ମଧ୍ୟ ରୁଜୁ ହୋଇଛି । ମାମଲା ରୁଜୁ ହେଲା ପରେ ରିପବ୍ଲିକ ଭାରତର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀ କହିଛନ୍ତି ଯେ ‘ଏକ ହଜାର ମାମଲା ବହୁତ କମ୍, ୧କୋଟି ମାମଲା ରୁଜୁ କର ଆମେ ଉତ୍ତର ଦେବୁ’ ।