କୁଜଙ୍ଗ, (ବଡ଼ ଖବର ବ୍ୟୁରୋ): କଥାରେ ଅଛି ସରକାର କା ମାଲ ଦରିଆ ମେଁ ଡାଲ୍ ନୀତିରେ ବନବିଭାଗ କ୍ୱାର୍ଟର୍ସ ନିର୍ମାଣରେ ବହୁ ଦିନର ପୁରୁଣା ଇଟା ବ୍ୟବହାର କରୁଥିବା ଦେଖିବାକୁ ମିଳିଛି। ଏଭଳି ଦୃଶ୍ୟ ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ କୁଜଙ୍ଗ ନିକଟ ପାତ୍ର ଛକଠାରେ। ଜଙ୍ଗଲ ବିଭାଗ ପକ୍ଷରୁ ବିଭାଗୀୟ କର୍ମଚାରୀଙ୍କ ଗୃହ ନିର୍ମାଣ ହେଉଥିବା ବେଳେ ଦୀର୍ଘଦିନ ହେଲା ଜରାଜୀର୍ଣ୍ଣ ଅବସ୍ଥାରେ ପଡ଼ି ରହିଥିବା ଇଟା ଏଥିରେ ବ୍ୟବହାର କରାଯାଉଛି। ଏପରି କାମ ଦେଖି ସ୍ଥାନୀୟ ଲୋକେ ପ୍ରତିବାଦ କରିଥିଲେ। ତେବେ ଆବଶ୍ୟକ ଅର୍ଥ ବରାଦ କରାଯାଇ ନ ଥିବାରୁ ପୁରୁଣା ଇଟାରେ କାମ କରାଯାଉଥିବା ସ୍ଥାନୀୟ ରେଞ୍ଜର ମାନସ କୁମାର ଦାସ ସଫେଇ ଦେଇଥିଲେ।
ତେବେ ବହୁ ଦିନ ଧରି କୁଜଙ୍ଗଠାରେ ବନ ବିଭାଗ କ୍ୱାର୍ଟର୍ସ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଥିଲା। ସେଠାରେ ଗୃହ ନିର୍ମାଣ ପାଇଁ ବିଭାଗ ପକ୍ଷରୁ ୮ଲକ୍ଷ ୧୯ ହଜାର ଟଙ୍କା ବ୍ୟୟ ବରାଦ କରାଯାଇଥିବା ବେଳେ ପୁରୁଣା ଇଟାରେ ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗ ହୋଇଛି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ବିହିତ ପଦକ୍ଷେପ ଗ୍ରହଣ କଲେ ହୁଏତ ଠିକ ଭାବେ ଗୃହ ନିର୍ମାଣ ହୋଇପାରିବ ବୋଲି ଆଶା କରାଯାଉଛି।
