ସ୍ୱାସ୍ଥ୍ୟ ସେବା ବିପର୍ଯ୍ୟସ୍ତ
ବୋଲଗଡ଼(ବଡ଼ ଖବର ବ୍ୟୁରୋ): ଖୋର୍ଦ୍ଧା ଜିଲ୍ଲା ବୋଲଗଡ଼ରେ ସ୍ୱାସ୍ଥ୍ୟ ସେବା ବିପର୍ଯ୍ୟସ୍ତ ହୋଇପଡ଼ିଛି । ସ୍ୱାସ୍ଥ୍ୟକେନ୍ଦ୍ରରେ ଡ଼ାକ୍ତର ସମସ୍ୟା ଲାଗିରହିଛି । ଏହି ପଦବୀ ପୂରଣ ନହେଲେ ଜାତୀୟ ରାଜପଥ ୫୭କୁ ଗଣତାନ୍ତ୍ରିକ ଉପାୟରେ ବନ୍ଦ କରାଯିବ ବୋଲି ବୋଲଗଡ ବଣିକ ମହାସଙ୍ଘ ପକ୍ଷରୁ ସୂଚନା ଦିଆଯାଇଛି । ବ୍ଳକରେ ୮ଟି ସ୍ୱାସ୍ଥ୍ୟକେନ୍ଦ୍ରରେ ୧୮ ଜଣ ଡ଼ାକ୍ତର ରହିବା ବଦଳରେ ୪ ଜଣ ସ୍ଥାୟୀ ଡ଼ାକ୍ତର ଅଛନ୍ତି ।
ଏହି ପଦବୀକୁ ପୂରଣ କରିବାକୁ ଅଞ୍ଚଳବାସୀ ଦାବି କରୁଥିଲେ ମଧ୍ୟ ତାହା ବିଭାଗ ପକ୍ଷରୁ ପୂରଣ କରାଯାଉନାହିଁ । ପ୍ରତ୍ୟକ ଦିନ ୩୦୦ରୁ ୪୦୦ ରୋଗୀ ପଞ୍ଜୀକୃତ କରୁଛନ୍ତି । ଦିନକୁ ଦିନ ରୋଗୀ ସେବା ବାଧାପ୍ରାପ୍ତ ହେଉଛି । ତେବେ ଏନେଇ ଅଞ୍ଚଳବାସୀ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଡ଼ାକ୍ତରଖାନାରେ ଖାଲି ପଡ଼ିଥିବା ପଦବୀଗୁଡ଼ିକ ଶୀଘ୍ର ପୂରଣ କରାନଗଲେ ପୁଣିଥରେ ଜାତୀୟ ରାଜପଥକୁ ଅନିଦ୍ଧିଷ୍ଟ କାଳ ପର୍ଯ୍ୟନ୍ତ ଗଣତାନ୍ତ୍ରିକ ଉପାୟରେ ବନ୍ଦ କରାଯିବ ବୋଲି କହିଛନ୍ତି ।