ଭୁବନେଶ୍ୱର (ବଡ଼ ଖବର ବ୍ୟୁରୋ): ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଶୁକ୍ରବାର ବିଧାନସଭାରେ ଧାନକିଣା ସମ୍ପର୍କରେ ଲିଖିତ ବିବୃତ୍ତି ରଖିଛନ୍ତି । ମନ୍ତ୍ରୀ କହିଛନ୍ତି ରାଜ୍ୟରେ ଚଳିତ ଖରିଫ ଧାନ ସଂଗ୍ରହରେ ଅଧ୍ୟାବଧି ସର୍ବମୋଟ୍ ୬୧.୨୪ଲକ୍ଷ ମେଟ୍ରିକ୍ ଟନ୍ ଧାନ ସଂଗ୍ରହ କରାଯାଇଛି । ସଂଗୃହିତ ଧାନର ମୂଲ୍ୟ ୧୧,୪୪୧କୋଟି ଟଙ୍କା । ଧାନକିଣା ଜାରି ରହିଛି । ଏହା ୩୧ମାର୍ଚ୍ଚ ପର୍ଯ୍ୟନ୍ତ ଚାଲୁରହିବ । କୌଣସି ପଞ୍ଜିକୃତ ଚାଷୀ ସରକାରଙ୍କୁ ଧାନ ବିକିବା ପାଇଁ ଯେପରି ଅସୁବିଧାର ସମ୍ମୁଖୀନ ନ ହୁଅନ୍ତି, ତାହା ସୁନିଶ୍ଚିତ କରିବା ପାଇଁ ମୁଖ୍ୟମନ୍ତ୍ରୀ ମଧ୍ୟ ନିର୍ଦ୍ଦେଶ ଦେଇଛନ୍ତି ।
ବିଗତ ଖରିଫରେ ଏହି ସମୟସୁଦ୍ଧା ୫୧.୭୩ଲକ୍ଷ ମେଟ୍ରିକ୍ ଟନ୍ ଧାନ କିଣାଯାଇଥିଲା । ବିଗତ ଖରିଫ୍ ତୁଳନାରେ ଚଳିତ ଖରିଫରେ ଧାନ କ୍ରୟର ହାର ୧୮ପ୍ରତିଶତ ଅଧିକ ରହିଛି । ବିଗତ ଖରିଫରେ ୫୩.୩୧ଲକ୍ଷ ମେଟ୍ରିକ୍ ଟନ୍ ଧାନ ସଂଗ୍ରହ କରାଯାଇଥିଲା । ଚଳିତ ଖରିଫରେ ଅଦ୍ୟାବଧି ୧୧.୫୦ଲକ୍ଷ ଚାଷୀ ସରକାରଙ୍କୁ ଧାନ ବିକ୍ରି କରିଛନ୍ତି । ଗତ ବର୍ଷ ଏହି ସମୟ ମଧ୍ୟରେ ସରକାରଙ୍କୁ ଧାନ ବିକିଥିବା ଚାଷୀଙ୍କ ସଂଖ୍ୟା ଥିଲା ୯.୩୦ଲକ୍ଷ ।
ବଲଙ୍ଗୀର ଜିଲ୍ଲାର ୪ଟି ପ୍ରାଥମିକ କୃଷି ସମବାୟ ସମିତି ଓ ଗୋଟିଏ ସ୍ୱୟଂ ସହାୟକ ଗୋଷ୍ଠୀର ଧାନକ୍ରୟ କେନ୍ଦ୍ର ପୁନର୍ବାର ଚାଲୁ କରାଯାଇ ୫୦ଜଣ ଚାଷୀଙ୍କଠାରୁ ୨୬୩୬.୦୬ କ୍ୱିଣ୍ଟାଲ ଧାନ କିଣାଯାଇଛି । ଏହି ଜିଲ୍ଲାରେ ଟୋକନ୍ ଲାପ୍ସ ହୋଇଥିବା ୪୫୦ ଚାଷୀଙ୍କର ଅନୁସନ୍ଧାନ ଚାଲୁରହିଛି । ଏହି ଜିଲ୍ଲାରୁ ଆସିଥିବା ୪୦୦ନକଲି ଚାଷୀଙ୍କ ବାବଦରେ ତଦନ୍ତ କରାଯାଇଛି । ଦେବଗଡ଼ ଜିଲ୍ଳାରେ ଧାନକିଣାକୁ ପ୍ରୋତ୍ସାହନ ଦେବା ପାଇଁ ସମ୍ବଲପୁର ଜିଲ୍ଲାରୁ ୬ଜଣ ମିଲରମାନଙ୍କ ଅମାନତ ଜମା ନିୟମକୁ କୋହଳ କରାଯାଇଛି ।
ଦେବଗଡ଼ ଜିଲ୍ଳାପାଳ ବୈଧତା ହରାଇଥିବା ଟୋକନ ବାବଦରେ ତଦନ୍ତ କରୁଛନ୍ତି । ସେହିପରି ମୟୂରଭଞ୍ଜ ଜିଲ୍ଲାପାଳ ୫୦୦୦ଲାପ୍ସ ଯୋକନ ବାବଦରେ ତଦନ୍ତ କରୁଛନ୍ତି । ବରଗଡ଼ ଜିଲ୍ଲାରେ ୮୧୬ଚାଷୀଙ୍କଠାରୁ ପୁନର୍ବାର ଧାନ କିଣାଯାଇଛି । ୧୦୦ଜଣ ଫାକ୍ସ ସମ୍ପାଦକଙ୍କୁ ନିଲମ୍ବିତ ଓ ୭ଜଣ କର୍ମକର୍ତ୍ତାଙ୍କୁ ବହିଷ୍କାର କରାଯାଇଛି । ଧାନକିଣାରେ ଅନିୟମିତା କରିଥିବା ଅଭିଯୋଗରେ ପଦ୍ମପୁର ଓ ଚାନ୍ଦବାଲି ସମ୍ପାଦକଙ୍କୁ ନିଲମ୍ବିତ କରାଯାଇଛି ।
