ପାକିସ୍ତାନକୁ ୪-୦ରେ ପରାସ୍ତ କଲା ଭାରତ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଏସୀୟ ଚାମ୍ପିଅନ୍ସ ଟ୍ରଫି ହକି । ପାକିସ୍ତାନକୁ ୪-୦ରେ ପରାସ୍ତ କଲା ଭାରତ । ୧୩ ପଏଣ୍ଟ ପାଇଁ ଟେବୁଲ ଟପ୍ ସହ ସେମିରେ ପ୍ରବେଶ କରିଛି ଟିମ୍ ଇଣ୍ଡିଆ । ଭାରତ ପକ୍ଷରୁ ଅଧିନାୟକ ହରମନପ୍ରୀତ ସିଂହ ଦୁଇଟି ଗୋଲ ସ୍କୋର କରିଥିଲେ । ଯୁଗରାଜ ସିଂ ଓ ଆକାଶଦୀପ ସିଂହ ଗୋଟିଏ ଲେଖାଏଁ ଗୋଲ ଦେଇଛନ୍ତି । ପାକିସ୍ତାନ ଏହି ମ୍ୟାଚ୍ରେ ଗୋଲ ଦେବାକୁ ଚେଷ୍ଟା କରିଥିଲେ ମଧ୍ୟ ଭାରତୀୟ ଡିଫେଣ୍ଡରଙ୍କ ଆଗରେ ଫେଲ ମାରିଛି । ଭାରତଠାରୁ ପରାଜୟ ପରେ ସେମିଫାଇନାଲରୁ ବାଦ ପଡିଛି ପାକିସ୍ତାନ ।
ଭାରତ-ପାକ୍ ଲଢ଼େଇ ବେଶ ଦମଦାର ହୋଇଥିଲା । ପ୍ରଥମ କ୍ୱାର୍ଟରରୁ ହିଁ ଭାରତୀୟ ଟିମ୍ ଆଟାକିଂ ଖେଳ ପ୍ରଦର୍ଶନ କରିଥିଲା । ପ୍ରଥମ କ୍ୱାର୍ଟରରେ ହରମନପ୍ରୀତ ସିଂହ ଗୋଲ ଦେଇ ୧-୦ରେ ଆଗୁଆ କରି ଦେଇଥିଲେ । ଦ୍ୱିତୀୟ କ୍ୱାର୍ଟରରେ ମଧ୍ୟ ଭାରତର ଦବଦବା ଦେଖିବାକୁ ମିଳିଥିଲା । ଦ୍ୱିତୀୟ ଗୋଲକୁ ମଧ୍ୟ ହରମନପ୍ରୀତ ସିଂହ ଦେଇଥିଲେ । ତେବେ ଶୁକ୍ରବାର ସେମିଫାଇନାଲରେ ଭାରତ ଟେବୁଲର ଚତୁର୍ଥ ସ୍ଥାନରେ ଥିବା ଜାପାନକୁ ଭେଟିବ । ଅନ୍ୟ ଏକ ସେମିଫାଇନାଲରେ ଦ୍ୱିତୀୟ ସ୍ଥାନରେ ଥିବା ମାଲେସିଆ ଓ କୋରିଆ ମୁହାଁମୁହିଁ ହେବେ ।