ଯାତକଙ୍କ ଜାତକରେ ନାହିଁ ସରକାରୀ ସହାୟତା

ଛେଣ୍ଡିପଦା (ବଡ଼ ଖବର ବ୍ୟୁରୋ): ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ ଶିମିଳିପାଳ ପଞ୍ଚାୟତ ଚରାକାନି ଗାଁର ୭୦ ବର୍ଷୀୟା ବିଧବା ମହିଳା ଯାତକ ଚନ୍ଦନ । ଯାତକ ଗରିବ ଅସହାୟ ହୋଇଥିଲେ ସୁଦ୍ଧା ସରକାରୀ ସହାୟତା ତାଙ୍କ ଲାଗି ସାତସପନ । ଭଙ୍ଗା ଦଦରା ଘରେ ଭାଗ୍ୟକୁ ଆଦରି ଭଗବାନଙ୍କ ଭରସାରେ ଏକାକୀ ଜୀବନ କାଟୁଛନ୍ତି ଯାତକ । ଝାଟିମାଟି ଚାଳଛପର ଘର କେତେ ବେଳେ ଯେ ଭାଙ୍ଗିଯିବ କହିହେଉ ନାହିଁ । ଘରେ ଦିନରେ ଖରା ଆଉ ରାତିରେ ତାରା ଦିଶୁଛି । ସବୁବେଳେ ରହୁଛି ସାପର ଭୟ । ଆବାସ ଯୋଜନାରେ ପକ୍କାଘର ଖଣ୍ଡେ ଲାଗି ପ୍ରଶାସନିକ ଅଧିକାରୀଙ୍କଠାରୁ ଆରମ୍ଭ କରି ରାଜନେତାଙ୍କୁ ଗୁହାରି କରିଥିଲେ ସୁଦ୍ଧା ଫଳାଫଳ ଶୂନ ।

ଦୀର୍ଘଦିନ ହେବ ଦିବ୍ୟାଙ୍ଗ ସ୍ୱାମୀ ଦିବାକରଙ୍କ ମୃତ୍ୟୁ ହୋଇଛି । ଧାର ଉଦ୍ଧାର କରି ସ୍ୱାମୀଙ୍କ ଶୁଦ୍ଧିକ୍ରିୟା କରିଥିଲେ ସୁଦ୍ଧା ଏଯାବତ ହରିଶ୍ଚନ୍ଦ୍ର ଯୋଜନାରେ ଯାତକଙ୍କୁ ମିଳିନାହିଁ ଟଙ୍କା । ଛେଳି ଚରାଇ ଋଣ ପରିଶୋଧ କରିଛନ୍ତି ଯାତକ । ସରକାରୀ ଯୋଜନା କହିଲେ ମାସକୁ ମାତ୍ର ୫କେଜି ଚାଉଳ ମିଳୁଛି । ସରକାରୀ ସହାୟତା ତାଙ୍କ ଲାଗି ସାତସପନ । ବିଧବା ଭତ୍ତା ଓ ଆବାସ ଯୋଜନାରୁ ବଞ୍ଚିତ ହୋଇଛନ୍ତି ସେ । ଆବାସ ଯୋଜନାରେ ପକ୍କାଘର ଖଣ୍ଡେ ଲାଗି ନିବେଦନ କରିଥିଲେ ସୁଦ୍ଧା ଫଳାଫଳ ଶୂନ । କୋଇଲା ଖଣି ଅଧିଗ୍ରହଣ ଅଞ୍ଚଳ ହୋଇଥିବାରୁ ଆବାସ ଯୋଜନାରେ ପକ୍କାଘର ଖଣ୍ଡେ ମିଳୁନାହିଁ । ଯାହାକୁ ନେଇ ସ୍ଥାନୀୟ ଲୋକେ କହୁଛନ୍ତି ସତରେ କଣ ଯାତକଙ୍କ ଜାତକରେ ନାହିଁ ସରକାରୀ ସହାୟତା ।