ମୁଖ୍ୟମନ୍ତ୍ରୀ କେଉଁଠିକୁ ଯିବା ପରିସ୍ଥିତିରେ ନାହାନ୍ତି: ଜୟଦେବ ଜେନା

ଭୁବନେଶ୍ୱର (ବଡ଼ ଖବର ବ୍ୟୁରୋ): ବିଜେଡିକୁ ଟାର୍ଗେଟ କଲେ ପୂର୍ବତନ ପିସିସି ସଭାପତି ଜୟଦେବ ଜେନା । କହିଛନ୍ତି ମୁଖ୍ୟମନ୍ତ୍ରୀଙ୍କ ଅଡିଓ ପ୍ରମାଣିତ କରୁଛି ଯେ ମୁଖ୍ୟମନ୍ତ୍ରୀ ଆଉ କେଉଁଠିକୁ ଯିବା ପରିସ୍ଥିତିରେ ନାହାନ୍ତି । ତେଣୁ ତାଙ୍କ ତରଫରୁ ୫-ଟି ସଚିବ ବୁଲି ବୁଲି ପ୍ରଚାର କରୁଛନ୍ତି । ସେ ହେଉଛନ୍ତି ବର୍ତ୍ତମାନ ମୁଖ୍ୟମନ୍ତ୍ରୀଙ୍କର ତତ୍ୱାବଧାରକ ଏବଂ ସେ ହିଁ ସବୁ ଦାୟିତ୍ୱ ନେବେ । ଆହୁରି ମଧ୍ୟ ସେ କହିଛନ୍ତି ୫-ଟି ସଚିବ ବା ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଯେମିତି ବିଭିନ୍ନ ସ୍ଥାନରେ ଘୋଷଣା କରୁଛନ୍ତି ଆଉ ତାଙ୍କ ଘୋଷଣାକୁ ପ୍ରମାଣିତ କରିବା ପାଇଁ ଗୋଟେ ଅଡିଓ ରେକଡିଂକୁ ସାମ୍ନାକୁ ଅଣା ଯାଉଛି ।

ଏଭଳି ବ୍ୟବସ୍ଥା ମୁଁ ୫୦ ବର୍ଷର ରାଜନୀତି ଭିତରେ କେବେ ଦେଖିନଥିଲି । ମୁଖ୍ୟମନ୍ତ୍ରୀ ଯେକୌଣସି ବି ସଚିବଙ୍କୁ ପଠାଇ ପାରିବେ । ଜଣେ ନିର୍ଦ୍ଦିଷ୍ଟ ସଚିବଙ୍କୁ ସବୁ ଜାଗାକୁ ପଠେଇକି ଘୋଷଣା କରିବା ତାଙ୍କୁ ସମ୍ବର୍ଦ୍ଧିତ କରିବା ଓ ଫୁଲ ଉପରେ ଚାଲିବା, ପୁଷ୍ପ ବର୍ଷା କରାଯିବା, ମନ୍ତ୍ରୀ ବିଧାୟକମାନେ ତଳେ ବସିବା ଏପରି ବ୍ୟବସ୍ଥା କେଉଁ ରାଜ୍ୟରେ ବି ନାହିଁ । ବିଜୁ ଜନତା ଦଳରେ ଗୋଟେ ଅଚଳ ଅବସ୍ଥା ଦେଖା ଦେଇଛି । ମନ୍ତ୍ରୀ କି ମୁଖ୍ୟ ଶାସନ ସଚିବଙ୍କ ଉପରେ ମୁଖ୍ୟମନ୍ତ୍ରୀଙ୍କର ଆଉ ଭରସା ନାହିଁ ।