ବଡ଼ ଖବର ବ୍ୟୁରୋ: କିନ୍ନର ତଷ୍ଣୁଭା ଅନାନ । ବାଂଲାଦେଶର ଏକ ଟିଭି ଚ୍ୟାନେଲର ଉପସ୍ଥାପିକା । ଉପସ୍ଥାପନା ଶୈଳୀ, ବୀଣାଜିଣା କଣ୍ଠ ତାଙ୍କୁ ଦେଇଛି ଭିନ୍ନ ପରିଚୟ । ଜଣେ କିନ୍ନର ଭାବେ ନ୍ୟୁଜ ପଢୁଥିବାରୁ ସବୁଠି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି । ପ୍ରଥମ କିନ୍ନରଭାବେ ତନଶୁଭା ବାଂଲାଦେଶର ନ୍ୟୁଜ ଆଙ୍କର ହୋଇଛନ୍ତି । ପଢିଲାବେଳେ ଝରିପଡ଼ିଥିଲା ତାଙ୍କ ଆଖିରୁ ଲୁହ ଏବଂ ବର୍ଣ୍ଣନା କରିଥିଲେ ନିଜ ଜୀବନର ସଙ୍ଘର୍ଷମୟ କାହାଣୀ ।
ତାଙ୍କ କହିବା ଅନୁସାରେ, କିଶୋରାଵସ୍ଥାରେ ଯେତେବେଳେ ତାଙ୍କୁ ଅନ୍ୟମାନଙ୍କଠାରୁ ଭିନ୍ନ ଅନୁଭବ ହୋଇଥିଲା, ସେତେବେଳେ ସେ ଘରେ ଏ ବାବଦରେ ଜଣାଇଥିଲେ । ଆଉ ଅନେକ ବର୍ଷ ଧରି ସେ ଯୌନ ଶୋଷଣର ଶିକାର ମଧ୍ୟ ହୋଇଥିଲେ । ପରିବାର ସଦସ୍ୟ ତାଙ୍କୁ ଚୁପ ରହିବାକୁ ବାଧ୍ୟ କରୁଥିଲେ ।
ବାପା, ତାଙ୍କ ସହ କଥାବାର୍ତ୍ତା କରିବା ମଧ୍ୟ ବନ୍ଦ କରିଦେଇଥିଲେ । ମନରେ ଅନେକ ଥର ଆତ୍ମହତ୍ୟା କରିବାକୁ ତାଙ୍କ ମନରେ ଭାବନା ଆସିଥିଲା । ପରିବାରର ନିର୍ୟାତନା ବଢିବା ପରେ ସେ ଘର ଛାଡି ଢାକା ଚାଲିଆସିଥିଲେ । ପରେ ଥିଏଟରରେ କାମ କରିବା ଆରମ୍ଭ କରିଥିଲେ ।ଜାନୁୟାରୀ ମାସରେ ପବ୍ଲିକ ହେଲଥରେ ମାଷ୍ଟର ଡିଗ୍ରୀ ହାସଲ କରିଥିବାବେଳେ ଅଢେଇ ମାସ ତଳେ ବୋଏସାଖୀ ଟିଭିରେ ନ୍ୟୁଜ ଆଙ୍କର ଭାବେ ଅଡିସନ ଦେଇଥିଲେ । ନିର୍ଭୁଲ ଉଚ୍ଚାରଣ ପାଇଁ ତାଙ୍କୁ ଚୟନ କରାଯାଇଥିଲା ।
