ଲଖିମପୁର ଖେରି ମାମଲା; ମୃତ ଚାଷୀ ପରିବାରକୁ ମିଳିବ ୧ କୋଟି ସହାୟତା
ଲଖିମପୁର(ବଡ଼ ଖବର ବ୍ୟୁରୋ): ଲଖିମପୁର ଖେରି ମାମଲାର ଚର୍ଚ୍ଚା ଦିନକୁ ଦିନ ସାରା ଦେଶରେ ବଢିବାରେ ଲାଗିଛି । ଏନେଇ ରାଜନୈତିକ ମାହୋଲ ମଧ୍ୟ ସରଗରମ ହୋଇଉଠିଛି । କାହାକୁ ବିମାନବନ୍ଦଳରରୁ ଫେରାଇ ଦିଆଯାଉଛି ତ ଆଉ କାହାକୁ ଗିରଫ କରାଯାଉଛି । ଆଗକୁ ଉତ୍ତରପ୍ରଦେଶ ବିଧାନସଭା ନିର୍ବାଚନ ଥିବାରୁ ଏହାକୁ ଏକ ବଡ଼ ରାଜନୈତିକ ମୁଦ୍ଦା କରିବା ଲକ୍ଷରେ ବିରୋଧୀ ଦଳ ଅଛନ୍ତି । ଏହା ମଧ୍ୟରେ ଛତିଶଗଡ଼ ମୁଖ୍ୟମନ୍ତ୍ରୀ ଓ ପଞ୍ଜାବ ମୁଖ୍ୟମନ୍ତ୍ରୀ ବଡ଼ ଘୋଷଣା କରିଛନ୍ତି । ତେବେ ଘଟଣାରେ ମୃତ୍ୟୁବରଣ କରିଥିବା ୮ ଜଣ ଚାଷୀଙ୍କ ପରିବାରକୁ ଉଭୟ ସରକାର ୫୦-୫୦ ଲକ୍ଷ ଟଙ୍କାର ସହାୟତା ରାଶି ଘୋଷଣା କରିଛନ୍ତି ।
ଏ ଖବର ସାମ୍ନାକୁ ଆସିବା ପରେ ପୁଣି ଆଉ ଥରେ ଉତ୍ତରପ୍ରଦେଶରେ ରାଜନୀତି ଚଳଚଞ୍ଚଳ ହୋଇଉଠିଛି । ସେପଟେ ଉତ୍ତରପ୍ରଦେଶ ସରକାର ବିରୋଧୀ ଦଳର ନେତାମାନଙ୍କୁ ଲଖିମପୁର ଆସିବାକୁ ଅନୁୁମତି ଦେଇଥିବାର କଥା ସାମ୍ନାକୁ ଆସିଛି । ପ୍ରିୟଙ୍କା ଗାନ୍ଧୀ, ରାହୁଲ ଗାନ୍ଧୀ ସମେତ କଂଗ୍ରେସର ୫ ନେତାଙ୍କୁ ଲଖିମପୁର ଆସିବାକୁ ଅନୁମତି ମିଳିଛି । ଏହି ଲିଷ୍ଟରେ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ, ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନି ଓ ଯୁବନେତା ସଚିନ ପାଇଲଟ ସାମିଲ ଅଛନ୍ତି ।