ଜୀବନର ମୂଲ୍ୟ ପାଣି ଫୋଟକା ନା?

ଭୁବନେଶ୍ୱର (ବଡ଼ ଖବର ବ୍ୟୁରୋ): ଏ ଜୀବର ମୂଲ୍ୟ କ’ଣ ଯେ? ପାଣି ଫୋଟକା ପରି ନା? କେତେବେଳେ ଅଛି, କେତେବେଳେ ନାହିଁ । ବଂଚିଥିବା ବେଳେ ମଣିଷ ଏଠି କେତେ ସ୍ୱପ୍ନ ଦେଖେ । ବୁଢୀଆଣି ମାୟାଜାଲ ଭଳି ମୋହମାୟାରେ ପଡ଼େ । ସଂସାର, ପିଲାଛୁଆ, ଧନ, ସମ୍ପତ୍ତି ସବୁ ମୋର କହି ଗର୍ବ କରେ । ଏଇୟା ତ? ନା ଆଉ କିଛି? ହିଁ କରିବା ବି ସ୍ୱାଭାବିକ । କରିବନି କେମିତି ଯେ, ସକାଳ ହେଲା ମାତ୍ରକେ ତ ଏଠି ଧାଁ ଧପଡ଼ ଚାଲିଛି । ଜଣଙ୍କ ଉପରେ ପାଦ ଦେଇ ଆଉ ଜଣେ ଉଠୁଛି । ସେତେବେଳେ ସେ ଭାବୁଛି ଯେ ମୁଁ ଜିତିଗଲି ।

ଗଡ଼ ଜିତିଗଲି । ତା’ର ସମକକ୍ଷ ହେବାକୁ ଯେମିତି ଆଉ କେହି ନାହିଁ । ଏସବୁ ମୋହମାୟା ନୁହେଁ ତ ଆଉ କ’ଣ? ଯାହା କିଛି ଆପଣ ଶୁଣିଲେ ଇଏ ଗୋଟିଏ ପଟେ, ଅନ୍ୟପଟେ ଆପଣଙ୍କ ଭାଗ୍ୟ ଭବିଷ୍ୟତ । ଆପଣ ଯାହା କିଛି କରିଛନ୍ତି କି କରୁଛନ୍ତି ଅବା କରିବାକୁ ଯାଉଛନ୍ତି, ତାହା କେବଳ ଲୋକ ଦେଖାଣିଆ । ଅନ୍ୟଟି ହେଉଛି ଆପଣ ଗୋଟିଏ କଣ୍ଢେଇ । ଆଉ ଜଣଙ୍କ ଇଶାରାରେ ଆପଣ ନାଚିବା ଛଡ଼ା ପାଖରେ ଆଉ କିଛି ନାହିଁ । ଆମେ ଏ କଥା କାହିଁକି କହିଲୁ ଥରୁଟିଏ ଶାନ୍ତ ମନରେ ଚିନ୍ତା କରନ୍ତୁ ।