ଚନ୍ଦ୍ରଗ୍ରହଣ ପାଇଁ ଅପରାହ୍ନ ୪ଟା୧୫ରୁ ଲିଙ୍ଗରାଜ ମନ୍ଦିରରେ ବନ୍ଦ ରହିବ ଦେବନୀତି
ଭୁବନେଶ୍ୱର (ବଡ଼ ଖବର ବ୍ୟୁରୋ): କୁମାର ପୂର୍ଣ୍ଣିମା ତଥା ଆସନ୍ତା ୨୮ରେ ଚନ୍ଦ୍ରଗ୍ରହଣ ହେଉଥିବାରୁ ମହାପ୍ରଭୁ ଲିଙ୍ଗରାଜଙ୍କ ନୀତିକାନ୍ତିରେ ପରିବର୍ତ୍ତନ କରାଯାଇଛି । ମନ୍ଦିର ପ୍ରଶାସନ ତରଫରୁ ଅତିରିକ୍ତ ଜିଲ୍ଲାପାଳ ତଥା ମନ୍ଦିର କାର୍ଯ୍ୟ ନିର୍ବାହୀ ଅଧିକାରୀ ଦିଲୀପ ମହାପାତ୍ରଙ୍କ ତତ୍ତ୍ୱାବଧାନରେ ହୋଇଥିବା ବୈଠକରେ କୁମାର ପୂର୍ଣ୍ଣିମା ଅପରାହ୍ନ ୪ଟା ୧୫ମିନିଟରେ ସମସ୍ତ ଦେବନୀତି ବନ୍ଦ ହେବ । ସେହିଦିନ ସକାଳ ୬ଟାରୁ ୬.୩୦ ମଧ୍ୟରେ ମଙ୍ଗଳ ଆଳତି, ଅବକାଶ ନୀତି କରାଯିବ ।
ସାଢ଼େ ୬ଟାରୁ ସକାଳ ୯ ଟାରେ ଗର୍ଭଗୃହ ସଫେଇ ହୋଇ ମାଘସ୍ନାନ, ଶ୍ରୀଜୀଉଙ୍କ ସନ୍ଧ୍ୟାଧୂପ, ଠାକୁରାଣୀଙ୍କ ସନ୍ଧ୍ୟାଧୂପ ଓ କାର୍ତ୍ତିକ ପୂଜା ଅପରାହ୍ନ ୪ଟା ମଧ୍ୟରେ ଶେଷ ହେବ । ରାତି୧୧.୩୦ରେ ଶ୍ରୀଜୀଉ ଗ୍ରହଣ ସ୍ନାନ ପାଇଁ ବିନ୍ଦୁସାଗରକୁ ଯାତ୍ରା କରିବେ । ସେଠାରୁ ମହାପ୍ରଭୁ ଲିଙ୍ଗରାଜ ମନ୍ଦିରକୁ ଫେରିବା ପରେ ରାତି ୨ଟା ୧୫ମିନିଟରେ ଗ୍ରହଣ ଭୋଗ ସମ୍ପାଦନ କରାଯିବ ।ଏହାପରେ ମାଘସ୍ନାନ ଓ ଧୋପଖାଳ କରାଯାଇ ଅନ୍ୟାନ୍ୟ ନୀତି କରାଯିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି ।