ଭୁବନେଶ୍ୱର (ବଡ଼ ଖବର ବ୍ୟୁରୋ): ସରକାରଙ୍କ କରୋନା କଟକଣା ହୋଇଛି ବାଟବଣା । ଆଇନ ଉଲ୍ଲଙ୍ଘନକାରୀଙ୍କୁ ସାବାଡ଼ କରୁଛି କମିଶନରେଟ୍ ପୋଲିସ । ମାସ୍କ୍ ପିନ୍ଧି ନଥିବା ଲୋକଙ୍କଠାରୁୁ ନେଉଛି ମୋଟା ଅଙ୍କର ତଣ୍ଡ । ରାସ୍ତାକଡ଼ରେ ବିକୁଥିବା ବେପାରୀଙ୍କ ଦୋକାନରେ ଗହଳି ହେଲେ ତାଗିଦ୍ କରୁଛି ପୋଲିସ । କରୋନା ଗାଇଡ଼ ଲାଇନ୍ ଅନୁସାରେ ସେ ନିରିହ ଚା ଦୋକାନୀ ହୁଅନ୍ତୁ ବା ପରିବା ବେପାରୀ ସମସ୍ତଙ୍କୁ ଦେବାକୁ ପଡୁଛି ଫାଇନ୍ ।
କିନ୍ତୁ ମଦ ଦୋକାନକୁ ଲୋକେ ବିନା ମାସ୍କରେ ଆସୁଛନ୍ତି । ସାନିଟାଇଜ ନକରି ଗ୍ରାହାକଙ୍କୁ ଦିଆଯାଉଛି ମଦ । ଦୋକାନ ଆଗରେ ଜମୁଛି ନାହିଁ ନଥିବା ଭିଡ଼ । ଲକ୍ଷ୍ମୀସାଗର ହେଉ ବା ରସୁଲଗଡ଼, ପଡ଼ୁନି କମିଶନରେଟ୍ ପୋଲିସର ନଜର । ଯାହାକୁ ନେଇ ସାଧାରଣ ଲୋକଙ୍କ ମନରେ ଉଠିଛି ଅନେକ ପ୍ରଶ୍ନ । ମଦ ବ୍ୟବସାୟୀଙ୍କ ଲାଗି କ’ଣ ଅଲଗା ନିୟମ? କାହିଁକି ଚୁପ୍ ବସିଛି ପୋଲିସ? ମଦ ବ୍ୟବସାୟୀଙ୍କ ସହ ହୋଇନାହିଁ ତ ବୁଝାବଣା? କେବେ ହେବ କାର୍ଯ୍ୟାନୁଷ୍ଠାନ?
