ମଝି ନଦୀରୁ ଟାୱାର ଉପରୁ ଉଦ୍ଧାର ହେଲେ ଯୁବକ

କଟକ (ବଡ଼ ଖବର ବ୍ୟୁରୋ): ନଦୀ ମଝିରେ ଟାୱାର ଉପରେ ଫସି ରହିଥିଲେ ଯୁବକ । ଫସିଥିବା ବ୍ୟକ୍ତିଙ୍କୁ ଉଦ୍ଧାର କଲା ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବା ବିଭାଗ । ଘଟଣାଟି ପ୍ରାୟ ଶନିବାର ରାତିରେ କଟକର ଲାଲବାଘ ଥାନା ଅନ୍ତର୍ଗତ ଗଣେଶ ଘାଟ ନିକଟରେ ଘଟିଥିଲା । ଜଣେ ବ୍ୟକ୍ତି ମହାନଦୀ ମଝିରେ ଥିବା ଏକ ଟାୱାର ଉପରେ ଫସି ରହିଥିବା ନେଇ ବିଡାନାସୀ ଅଗ୍ନିଶମ କେନ୍ଦ୍ରକୁ ଜରୁରୀ କଲ୍ ମିଳିଥିଲା ।

ଖବର ପାଇବା ମାତ୍ରେ ଅଗ୍ନିଶମ କର୍ମଚାରୀମାନେ ପାୱାର ବୋଟ୍ ସହ ଘଟଣାସ୍ଥଳକୁ ପହଞ୍ଚି ଉଦ୍ଧାର ଅଭିଯାନ ଆରମ୍ଭ କରିଥିଲେ । ଦୀର୍ଘ ପ୍ରୟାସ ପରେ ଟାୱାର ଉପରେ ଫସିଥିବା ବ୍ୟକ୍ତିଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା । ଉଦ୍ଧାର ହୋଇଥିବା ବ୍ୟକ୍ତି ଜଣଙ୍କ ହେଲେ କଟକ ଜିଲ୍ଲା ବାଙ୍କୀ ଥାନା ତାଳବସ୍ତ ଗ୍ରାମର ଶିବାନନ୍ଦ ନାୟକ। ଅଗ୍ନିଶମ ବାହିନୀର ତ୍ୱରିତ ପଦକ୍ଷେପ ଓ ସାହସିକ କାର୍ଯ୍ୟ ପାଇଁ ଏକ ମୂଲ୍ୟବାନ ଜୀବନ ରକ୍ଷା ପାଇଛି ।