ମଣିପୁର ଘଟଣା, ପୋଲିସ-ମହିଳା ଧସ୍ତାଧସ୍ତି

ଇମ୍ଫାଲ (ବଡ଼ ଖବର ବ୍ୟୁରୋ): ଦିନକୁ ଦିନ ମଣିପୁର ସ୍ଥିତି ଗମ୍ଭୀର ହେବାରେ ଲାଗିଛି । ଆଦିବାସୀ ମହିଳାଙ୍କୁ ଉଲଗ୍ନ କରି ରାସ୍ତାରେ ବୁଲାଇବା ସମଗ୍ର ଦେଶରେ ଲଜ୍ଜା ପରିସ୍ଥିତି ସୃଷ୍ଟି କରିଛି । ଘଟଣାକୁ ନେଇ ମାମଲାରେ ଆକ୍ରୋଶ ବଢ଼ିବାରେ ଲାଗିଛି। ଯାହାକୁ ନେଇ ଇମ୍ଫାଲର ଗାରି ଅଞ୍ଚଳରେ ମହିଳାମାନେ ଘଟଣାକୁ ନେଇ ବିରୋଧ ପ୍ରଦର୍ଶନ କରିଛନ୍ତି। ସେମାନେ ଟାୟାର ଜାଳିବା ସହ ନାରାବାଜି ଦେଉଥିବା ବେଳେ ପୋଲିସ ସହ ଧସ୍ତାଧସ୍ତି ମଧ୍ୟ ହୋଇଛନ୍ତି । ପରିସ୍ଥିତିକୁ ନିୟନ୍ତ୍ରଣକୁ ଆଣିବା ଲାଗି ପୋଲିସ ବିକ୍ଷୋଭକାରୀଙ୍କୁ ଘଉଡାଇ ଦେଇଛି।

ଏବେ ଅଞ୍ଚଳରେ ପୋଲିସ ଫ୍ଲାଗମାର୍ଚ୍ଚ କରୁଛି। ତେବେ ଶୁକ୍ରବାର ମଧ୍ୟ ଘଟଣାକୁ ବିରୋଧ କରି ଲୋକେ ରାସ୍ତାକୁ ଓହ୍ଲାଇଥିଲେ। ଏପରିକି ବିକ୍ଷୋଭକାରୀ ଜଣେ ଅଭିଯୁକ୍ତଙ୍କ ଘର ପୋଡି ମଧ୍ୟ ଦେଇଥିଲେ। ସେହିଭଳି ଘଟଣାରେ ଆଉ ଜଣେ ଅଭିଯୁକ୍ତ ଗିରଫ ହୋଇଛନ୍ତି। ଅଭିଯୁକ୍ତଙ୍କ ନାମ ୟାମଲେମ୍ବମ୍‌ ନଙ୍ଗସିଥୋଇ ମେଟାଇ ବୋଲି ଜଣାପଡ଼ିଛି। ପୂର୍ବରୁ ୪ ଅଭିଯୁକ୍ତ ଗିରଫ ହୋଇଥିବା ବେଳେ ଏବେ ମୋଟ ଗିରଫଦାରି ସଂଖ୍ୟା ୫କୁ ବୃଦ୍ଧି ପାଇଛି।