ମାଲକାନଗିରି(ବଡ଼ ଖବର ବ୍ୟୁରୋ): ମାଲକାନଗିରିର ପୂର୍ବତନ ଜିଲ୍ଲାପାଳ ମନିଷ ଅଗ୍ରୱାଲାଙ୍କୁ ତୁରନ୍ତ ଗିରଫ କରିବାକୁ କଂଗ୍ରେସ ଆଜି ସ୍ୱର ଶାଣିତ କରିଛି । କଂଗ୍ରେସ ନେତା ପ୍ରଦୀପ ମାଝୀଙ୍କ ନେତୃତ୍ୱରେ ଶତାଧିକ କଂଗ୍ରେସ କର୍ମୀ ଶୋଭାଯାତ୍ରାରେ ମାଲକାନଗିରି ସହର ପରିକ୍ରମା କରିଥିଲେ । କଂଗ୍ରେସ ଅଭିଯୋଗ କରିଛି ମନିଷ ଅଗ୍ରୱାଲ ମାଲକାନଗିରିରେ ଜିଲ୍ଲାପାଳ ଥିବା ବେଳେ ଜିଲ୍ଳା ଯୋଗାଣ ଅଧିକାରୀ ମନୋଜ ପ୍ରଧାନଙ୍କ ସହ ମିଶି ଧାନମଣ୍ଡି ଦୁର୍ନୀତିରେ ଲିପ୍ତ ଥିଲେ ।
ଯୋଗାଣ ଅଧିକାରୀଙ୍କ ନାମରେ ପୂର୍ବରୁ ଜୟପୁର, ବ୍ରହ୍ମପୁର ଓ କଳାହାଣ୍ଡିରେ ୩ଟି ଭିଜିଲାନ୍ସ ମାମଲା ରହିଛି । ଏହା ସତ୍ତେ୍ୱ ସେ ୧୦ବର୍ଷଧରି କିପରି ଗୋଟିଏ ଜିଲ୍ଲାରେ ରହିଲେ ବୋଲି କଂଗ୍ରେସ ପ୍ରଶ୍ନ କରିଛି । ମଣ୍ଡି ଦୁର୍ନୀତି ସହ ସ୍ୱଚ୍ଛ ଭାରତ ମିଶନ ଓ ଶ୍ରମିକଙ୍କୁ ଉପକରଣ ବଣ୍ଟନ ରେ ବ୍ୟାପକ ଦୁର୍ନୀତି ହୋଇଛି । ଉଭୟ ଅଧିକାରୀଙ୍କୁ ତୁରନ୍ତ ଗିରଫ କରିବା ପାଇଁ କଂଗ୍ରେସ ଦାବି କରିଛି । ଭିଜିଲାନ୍ସ ଡିଏସପିଙ୍କୁ ଦଳ ପକ୍ଷରୁ ଦାବିପତ୍ର ସହ ଅଡିଓ ଟେପ୍ ପ୍ରଦାନ କରାଯାଇଛି ।
