ମାଲକାନଗିରି (ବଡ଼ ଖବର ବ୍ୟୁରୋ): ବଣ୍ଡା ମେଧାବୀ ଛାତ୍ରୀ ଏବେ ଦିନ ମଜୁରିଆ । ଗତ ବର୍ଷ +୨ ବାଣିଜ୍ୟରେ ମାଲକାନଗିରି ଜିଲ୍ଲାର ସର୍ବୋଚ୍ଚ ନମ୍ବର ରଖି ପାସ୍ କରିଥିଲେ ଆଦିମ ଜନଜାତିର ବଣ୍ଡା ଝିଅ କରମା ମୁଦୁଲି । ବିଭିନ୍ନ ମହଲରେ ଉଚ୍ଚ ପ୍ରଶଂସିତ ହୋଇ ରମାଦେବୀ ମହାବିଦ୍ୟାଳୟରେ ଯୁକ୍ତ ୩ରେ ନାମ ଲେଖାଇ ଥିଲେ କର୍ମା । ଏବେ ନିଜ ଉଚ୍ଚ ଶିକ୍ଷା ଖର୍ଚ୍ଚ ମେଣ୍ଟାଇବା ପାଇଁ ପାଲଟିଛନ୍ତି ଦିନ ମଜୁରିଆ । ଟାଣ ଖରାରେ ରଡ ସିମେଣ୍ଟ କାମ କରୁଛନ୍ତି କରମା । ତେବେ ପ୍ରଶ୍ନ ଉଠୁଛି ଆଦିମ ଜନଜାତି ବଣ୍ଡାଙ୍କ ବିକାଶ ଲାଗି କେତେ କ’ଣ ଯୋଜନା ରହିଛି । ତଥାପି କାହିଁକି ଏହି ମେଧାବୀ ଛାତ୍ରୀ ଏମିତି ଦୁର୍ଦ୍ଦଶା ଭୋଗୁଛନ୍ତି? ବର୍ତ୍ତମାନ ତାଙ୍କର ହଷ୍ଟେଲ ଖର୍ଚ୍ଚ ୨୪ହଜାର ଟଙ୍କା, ବହି ଖାତା ଓ ଅନ୍ୟ ଖର୍ଚ୍ଚ ୫ହଜାର ଟଙ୍କାର ନିତାନ୍ତ ଆବଶ୍ୟକ ।
ତେବେ ଏ ସମ୍ପର୍କିତ ଖବର ଗଣମାଧ୍ୟମରେ ପ୍ରକାଶ ପାଇବା ପରେ ରାଜ୍ୟ ସରକାରଙ୍କ ଚେତା ପଶିଛି । ମେଧାବୀ ବଣ୍ଡା ଛାତ୍ରୀ କର୍ମା ମୁଦୁଲିଙ୍କୁ ସହାୟତାର ହାତ ବଢ଼ାଇଲା ପ୍ରଶାସନ । ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଦିଆଯାଇଛି ସହାୟତାର ପ୍ରତିଶ୍ରୁତି । ମେଧାବୀ କର୍ମାଙ୍କ ପଢ଼ା ଖର୍ଚ୍ଚ ବହନ କରିବାକୁ ଜିଲ୍ଲା ପ୍ରଶାସନର ପ୍ରତିଶ୍ରୁତି ।
