‘ରାଜନୈତିକ ଏଜେଣ୍ଡା ବୁଝିପାରୁ ନାହିଁ’

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ରାହୁଲ ଗାନ୍ଧୀ ପ୍ରଧାନମନ୍ତ୍ରୀଙ୍କ ପନୌତି କହିବା ପରେ ବିବାଦ ବଢି ଚାଲିଛି । ଏବେ ପ୍ରତିକ୍ରିୟା ରଖିଛନ୍ତି କ୍ରିକେଟର ମହମ୍ମଦ ଶାମି । ଶାମି ବିଶ୍ୱକପ ୨୦୨୩ରେ ସର୍ବାଧିକ ୱିକେଟ ନେଇ ରେକର୍ଡ କରିଥିଲେ। ସେ ମାତ୍ର ୭ ଟି ମ୍ୟାଚରେ ୨୪ଜଣ ବ୍ୟାଟ୍ସମ୍ୟାନଙ୍କୁ ପାଭିଲିୟନର ରାସ୍ତା ଦେଖାଇଥିଲେ। ସେ ଫାଇନାଲରେ ୧ଟି ୱିକେଟ ନେଇଥିଲେ। ବିଶ୍ୱକପର ଫାଇନାଲ ମ୍ୟାଚ ଦେଖିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଷ୍ଟାଡିୟମରେ ପହଞ୍ଚିଥିଲେ। ବିଶ୍ୱକପରେ ଭାରତ ପରାଜୟ ପରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସମେତ ଅନେକ ଲୋକ ଭାରତୀୟ ପ୍ରଧାନମନ୍ତ୍ରୀଙ୍କୁ ‘ପନୌତି’ ବୋଲି କହିଛନ୍ତି।

ଗଣମାଧ୍ୟମ ସହ ବାର୍ତ୍ତାଳାପ ସମୟରେ ଖବରଦାତାମାନେ ମହମ୍ମଦ ଶାମିଙ୍କୁ ପଚାରିଥିଲେ, ରାହୁଲ ଗାନ୍ଧୀ ବିଶ୍ୱକପ ବିଷୟରେ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ ସେଠାରେ ଏକ ଷଡ଼ଯନ୍ତ୍ର ହୋଇଥିଲା, ଯେଉଁଥିପାଇଁ ଭାରତ ମ୍ୟାଚ ହାରିଯାଇଥିଲା। ଏହାର ଉତ୍ତରରେ ଶାମି କହିଛନ୍ତି, ମୁଁ ଏଭଳି ବିବାଦୀୟ ପ୍ରଶ୍ନକୁ ବୁଝି ପାରୁ ନାହିଁ। ବେସିକ ଜିନିଷ ଉପରେ ଧ୍ୟାନ ଦିଅନ୍ତୁ । ଯାହା ଉପରେ ଆମେ ଗତ ଦୁଇମାସ ଧରି କଠିନ ପରିଶ୍ରମ କରିଛନ୍ତି। ମୁଁ ଏହି ରାଜନୈତିକ ଏଜେଣ୍ଡା ବୁଝିପାରୁ ନାହିଁ।