‘ଟଙ୍କା ଦିଅ ରକ୍ତ ନିଅ’
ବାରିପଦା (ବଡ଼ ଖବର ବ୍ୟୁରୋ): ‘ରକ୍ତଦାନ ମହତଦାନ’ । ରକ୍ତ ଅଭାବରୁ ଯେଭଳି କାହାର ମୃତ୍ୟୁ ନହେଉ ସେଥିଲାଗି ବିଭିନ୍ନ ସ୍ଥାନରେ ‘ଜୀବନବିନ୍ଦୁ’ ଭଳି ରକ୍ତଦାନ ଶିବିର କରାଯାଉଛି । କିନ୍ତୁ ଅସହାୟ ଲୋକଙ୍କୁ ରକ୍ତ ଦରକାର ପଡିଲେ ମେଡିକାଲରେ କର୍ମଚାରୀମାନେ ନେଉଛନ୍ତି ମନଇଛା ଟଙ୍କା । ଟଙ୍କା ନଦେଲେ ମିଳୁନାହିଁ ରକ୍ତ । ଏମିତିକି ରକ୍ତ ଅଭାବରୁ ଅନେକଙ୍କ ଜୀବନ ବାଜିରେ ଲାଗିଥିବାର ନଜିର ମଧ୍ୟ ରହିଛି ।
କପ୍ତିପଦା ଉପଖଣ୍ଡ ଚିକିତ୍ସାଳୟର ରାକ୍ତଭଣ୍ଡାରୁରୁ ରକ୍ତ ବିକ୍ରି ହେଉଥିବା ଅଭିଯୋଗ ହୋଇଆସୁଛି । କାର୍ଯ୍ୟରତ କର୍ମଚାରୀ ପ୍ରଦୀପ କୁମାର ବେହେରାଙ୍କ ନାଁରେ ଅଭିଯୋଗ ଆଣିଛନ୍ତି ରାଜକିଶୋର ମୁର୍ମୁ । ରକ୍ତକୁ ପନ୍ଦରଶହ ଟଙ୍କାରେ ବିକ୍ରି କରୁଥିବାର ଭିଡିଓ ନଜରକୁ ଆସିଥିଲେ ସୁଦ୍ଧା ଏହାକୁ ଅସ୍ୱୀକାର କରିଛନ୍ତି ପ୍ରଦୀପ । ରାଜକିଶୋରଙ୍କ ଆଇମା’ଙ୍କର ଏ ପଜେଟିଭ ରକ୍ତ ଆବଶ୍ୟକ ହେଉଥିଲା । ରକ୍ତ ନଥିବା କହି ମେଡ଼ିକାଲ କର୍ତ୍ତୃପକ୍ଷ ପ୍ରଥମେ ମନା କରିଦେଇଥିଲେ । ପରେ ପ୍ରଦୀପ ରକ୍ତ ଦେବାର ପ୍ରତିଶ୍ରୁତି ଦେଇଥିଲେ । ରକ୍ତଭଣ୍ଡାରରୁ ରକ୍ତ ଆଣି ପନ୍ଦରଶହ ଟଙ୍କାରେ ରକ୍ତ ବିକ୍ରି କରିଥିଲେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହି ଘଟଣାରେ ରକ୍ତଭଣ୍ଡାର ମୁଖ୍ୟଙ୍କ ପ୍ରତିକ୍ରିୟା ମିଳିପାରିନାହିଁ ।