ନୂଆଗାଁ (ବଡ଼ ଖବର ବ୍ୟୁରୋ): ସମସ୍ୟା ନେଇ ଅଭିଯୋଗ କଲେ ସମାଧାନ ବଦଳରେ ମିଳୁଛି ମାଡ଼ ଧମକ । କେତେବେଳେ ସାଧାରଣ ଜନତାଙ୍କୁ ତ ଆଉ କେତେବେଳେ ତଳିଆ କର୍ମଚାରୀଙ୍କୁ । ପୁଣି ଆଉ କେତେବେଳେ ଠିକାଦାରଙ୍କୁ ମାଡ଼ ମାରି ବିବାଦରେ ରହିଛନ୍ତି ନୟାଗଡ଼ ଜିଲ୍ଲା ନୂଆଗାଁ ବିଡିଓ । ବିଡିଓ ପ୍ରମୋଦ କୁମାର ଦଳବେହେରା ଅଭିଯୋଗକାରୀଙ୍କୁ ମାଡ଼ ମାରୁଥିବା ଲୋକେ ଅଭିଯୋଗ କରିଛନ୍ତି । ଆଉ କେହି ଅଭିଯୋଗ ନ କରି ଡରିମରି ରହୁଛି ତ କିଏ କିଛି ପାଉଣା ନେଇ ଚୁପ୍ ରହୁଛି । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ବୁଧବାର ପାରାଢିପି ପଞ୍ଚାୟତ ରାମପଲୀର ଆଦିବାସୀ ସମ୍ପ୍ରଦାୟର କେତେଜଣ ବରିଷ୍ଠ ନାଗରିକ ଓ ମହିଳା ବିଡିଓଙ୍କୁ ବିଭିନ୍ନ ଦାବି ନେଇ ଗୁହାରି କରିବାକୁ ଆସିଥିଲେ । ସମସ୍ୟା ସମାଧାନ କରିବା ତ ଦୂର କଥା ଓଲଟା ସେମାନଙ୍କୁ ମାଡ଼ ମାରି ବେକ ବୁଲେଇଦେବାକୁ ବିଡିଓ ଧମକ ଦେଇଥିବା ସେମାନେ ଅଭିଯୋଗ କରିଛନ୍ତି । ଅଭିଯୋଗକାରୀଙ୍କ ଉପରକୁ ଟେବୁଲ ଉପରେ ଥିବା ଜିନିଷ ଫୋପାଡ଼ିବାକୁ ବିଡିଓ ଉଦ୍ୟମ କରିଥିବା ଭଳି ସଙ୍ଗିନ ଅଭିଯୋଗ କରିଛନ୍ତି ରାମପଲି ଗ୍ରାମର ବବିତା ପ୍ରଧାନ, କୁମାରୀ ବେହେରା, ସଞ୍ଜୁ ବେହେରା, ଶୁଶିଳା ବେହେରା । ସେପଟେ ଅଭିଯୋଗକୁ ସ୍ୱୀକାର କରିଛନ୍ତି ବିଡିଓ । ବିରକ୍ତ ହୋଇ ଏପରି କରିଥିବା ସେ କହିଛନ୍ତି ।
