ଭୁବନେଶ୍ୱର (ବଡ଼ ଖବର ବ୍ୟୁରୋ): ଆଜି ବିଧାନସଭା ଶୀତ ଅଧିବେଶନର ପ୍ରଥମ ଦିନ । ପ୍ରଥମ ଦିନରୁ ସରକାରଙ୍କୁ ହରଡ଼ଘଣାରେ ପକାଇଛନ୍ତି ବିରୋଧୀ । ଉଭୟ ବିଜେପି ଓ କଂଗ୍ରେସ ସରକାରଙ୍କୁ ଘେରିଛନ୍ତି । ଆଜି ଅଧିବେଶନ ଆରମ୍ଭରୁ ଦିବଂଗତ ନେତା ଓ କୋଭିଡ୍ ଯୋଦ୍ଧାମାନଙ୍କ ଉଦ୍ଦେଶ୍ୟରେ ଶୋକ ପ୍ରସ୍ତାବ ଆଗତ କରିଥିଲେ ବାଚସ୍ପତି । ଏହାକୁ ବିରୋଧୀ ଦଳ ନେତା ପ୍ରଦୀପ ନାଏକ ଓ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ସମର୍ଥନ କରିଥିଲେ ।
ଏହା ପରେ ଆରମ୍ଭ ହୋଇଥିଲା ଗୃହ କାର୍ଯ୍ୟ । ଗୃହ ଆରମ୍ଭରୁ ହାଜତ ମୃତ୍ୟୁକୁ କେନ୍ଦ୍ର କରି ଉଭୟ ବିଜେପି ଓ କଂଗ୍ରେସ ସଦସ୍ୟମାନେ ହୋହଲ୍ଲା କରିଥିଲେ । କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ସଚିବଙ୍କ ଚୌକି ଉପରକୁ ଉଠିବାକୁ ଚେଷ୍ଟା କରିଥିଲେ । ଏହି ସମୟରେ ବାଚସ୍ପତିଙ୍କ ସମ୍ମୁଖରେ ଲାଗିଥିବା କରୋନା ପ୍ରତିଷେଧକ କାଚ ଭାଙ୍ଗିଯାଇଥିଲା। ବିରୋଧୀ ଦଳଙ୍କ ହଟଗୋଳକୁ ଦୃଷ୍ଟିରେ ରଖି ପ୍ରଥମେ ବାଚସ୍ପତି ଗୃହକୁ ୧୫ ମିନିଟ ମୁଲତବୀ କରିଥିଲେ । ପରେ ପ୍ରବଳ ହଟ୍ଟଗୋଳ ହେବାରୁ ବାଚସ୍ପତି ଗୃହକୁ ଆଉ ୩୦ ମିନିଟ ମୁଲତବୀ ରଖି ସର୍ବଦଳୀୟ ବୈଠକ ଡ଼ାକିଥିଲେ । କିନ୍ତୁ ଏହି ସର୍ବଦଳୀୟ ବୈଠକକୁ ବୟକଟ କରିଛନ୍ତି ବିରୋଧୀ ଦଳ ।
