ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ତୁର୍କୀ ରିଲିଫ ପାଣ୍ଠିକୁ ୫୦ ପ୍ରତିଶତ ଦରମା ଦେବା ପାଇଁ ପାକିସ୍ତାନର ରାଜ୍ୟ ବା କେନ୍ଦ୍ର ସରକାରୀ ଅଧିକାରୀମାନଙ୍କୁ ବାଧ୍ୟ କରାଯାଇଛି। ଅଧିକାରୀମାନଙ୍କ ଦରମାରୁ ଜବରଦସ୍ତ ଏହି ଟଙ୍କା କାଟି ରଖାଯାଇଛି। ସେପଟେ ବେଲୁଚିସ୍ତାନର ଗ୍ରେଡ୍ ୧୯ରୁ ୨୧ ଅଧିକାରୀମାନେ ଏ ପ୍ରକାର ମନଇଚ୍ଛା ଦରମା କାଟକୁ ବିରୋଧ କରିଛନ୍ତି। ସେମାନେ ଅଭିଯୋଗ କରିଛନ୍ତି , ପାକିସ୍ତାନରେ ସାମ୍ପ୍ରତିକ ଦରଦାମ୍ ବୃଦ୍ଧି ହୋଇଛି । ଏତିକି ଦରମାରେ ପରିବାର ଚଳାଇବା କଷ୍ଟକର ହେଉଛି ।
ଏପରିସ୍ଥଳେ ଜବରଦସ୍ତ ଅଧା ଦରମା କାଟିଦେଲେ ଆମେ ଚଳିବେ କେମିତି? ସରକାରଙ୍କ ପକ୍ଷରୁ କୁହାଯାଇଛି ଯେ, ଗତବର୍ଷ ପାକିସ୍ତାନ ଯେତେବେଳେ ଦେଶବ୍ୟାପୀ ବନ୍ୟାପାଣିରେ ବୁଡ଼ି ରହିଥିଲା, ସେତେବେଳେ ତୁର୍କୀ ବହୁତ ସାହାଯ୍ୟ କରିଥିଲା। ୯ଟି ବିମାନରେ ୧୬ଟି କଣ୍ଟେନରରେ ଭର୍ତ୍ତି ୧୬୨ ଟନ୍ ରିଲିଫ ସାମଗ୍ରୀ ତୁର୍କୀ ପଠାଇଥିଲା। ତେଣୁ ଏବେ ଭୂକମ୍ପ-ପୀଡ଼ିତ ତୁର୍କୀର ବିପଦ ବେଳେ ପାକିସ୍ତାନ ଠିଆହେବା ଦରକାର।
