ଜଳେଶ୍ୱର(ବଡ଼ ଖବର ବ୍ୟୁରୋ): ବିଦ୍ୟାଳୟରେ ପାଚିକାଙ୍କ ଉପସ୍ଥିତିରେ ପିଲାଙ୍କୁ ମିଳୁନି ଖାଦ୍ୟ । କେବଳ ପିଲାଙ୍କୁ ପାଠ ପଢ଼ାଉଛନ୍ତି ପାଚିକା । ଖାଇବା ବଦଳରେ କଞ୍ଚା ଅଣ୍ଡା ନେଇ ଉପାସରେ ଘରକୁ ଫେରୁଛନ୍ତି ଛାତ୍ରଛାତ୍ରୀ । ଖାତା କଲମରେ ସବୁଦିନ ପଢୁଛି ପିଲାଙ୍କ ନାମରେ ମିଲ । ଏଭଳି କରୁଣ ଚିତ୍ର ଦେଖିବାକୁ ମିଳିଛି ବାଲେଶ୍ୱର ଭୋଗରାଇ ବାଡ଼ପୁର ପ୍ରାଥମିକ ବିଦ୍ୟାଳୟରେ । ଏହି ବିଦ୍ୟାଳୟରେ ପ୍ରଥମ ରୁ ପଞ୍ଚମ ଶ୍ରେଣୀ ଥିବାବେଳେ ୪୦ରୁ ଉର୍ଦ୍ଧ୍ବ ଛାତ୍ରଛାତ୍ରୀ ପାଠପଢନ୍ତି ।
ଭୁବନେଶ୍ୱରରେ ପାଚିକାଙ୍କ ଆନ୍ଦୋଳନ ଚାଲିଥିବା ବେଳେ ଗତ ମଙ୍ଗଳବାର ଦିନ ପାଚିକା ମଞ୍ଜୁ ସାହୁ ଉକ୍ତ ବିଦ୍ୟାଳୟକୁ ଆସି ଦୀର୍ଘ ସମୟ ଧରି ପିଲାଙ୍କୁ ପାଠ ପଢାଇବା ସହିତ ଆଜି ଖାଇବା ଦିଆଯିବନି ବୋଲି କହିଥିବା ବେଳେ ବିଦ୍ୟାଳୟରେ ପ୍ରଧାନ ଶିକ୍ଷକ ଦାଇତ୍ୱରେ ଥିବା ସାଧନା ଘଡାଇ ପିଲାଙ୍କୁ କଞ୍ଚା ଅଣ୍ଡା ଦେଇ ଉପାସରେ ଘରକୁ ପଠାଇଥିଲେ । କିନ୍ତୁ ପିଲାଙ୍କ ନାମରେ ମିଲ ପକାଇ ଦେଇଥିଲେ । ଘଟଣା ପ୍ରକଟ ହେବା ପରେ ଭୋଗରାଇ ଗୋଷ୍ଠୀ ଶିକ୍ଷା ଅଧିକାରୀ କୋମଲ ଲୋଚନ ବିଶ୍ୱାଳ ତଦନ୍ତ ଆରମ୍ଭ କରିବା ସହିତ ଅତିଶୀଘ୍ର କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।
