ରାହୁଲଙ୍କ ନାଁରେ ଅଛି ଅନେକ ମାନହାନି ମାମଲା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କଂଗ୍ରେସ ନେତା ତଥା ପୂର୍ବତନ ୱାୟନାଡ ସାଂସଦ ରାହୁଲ ଗାନ୍ଧିଙ୍କ ନାମରେ ରହିଛି ଅନେକ ମାନହାନି ମାମଲା । ଗୁଜୁରାଟର ସୁରତ କୋର୍ଟ ତାଙ୍କୁ ଗୋଟିଏ ମାମଲାରେ ଦୋଷୀ ସାବ୍ୟସ୍ତ କରି ଦଣ୍ଡାଦେଶ ଶୁଣାଇଛନ୍ତି । କିନ୍ତୁ ପାଟନା , ଅହମଦାବାଦ, ମୁମ୍ବାଇ, ମହାରାଷ୍ଟ୍ରର ଭିୱାଣ୍ଡି କୋର୍ଟରେ ମଧ୍ୟ ରାହୁଲଙ୍କ ନାଁରେ ମାନହାନି ମକଦ୍ଦମା ରୁଜୁ ହୋଇଛି । ଏହି ସବୁ କୋର୍ଟ ଗୁଡ଼ିକରୁ ସେ ଜାମିନ ପାଇଛନ୍ତି । ୨୦୧୯ରେ ପାଟନା କୋର୍ଟରେ ଜଣେ ବିଜେପି ନେତା ରାହୁଲ ଗାନ୍ଧିଙ୍କ ବିରୋଧରେ ମାନହାନି ମକଦ୍ଦମା ରୁଜୁ କରିଛନ୍ତି ।
ସେହିପରି ଅହମଦାବାଦ କୋର୍ଟରେ ଅହମଦାବାଦ ଜିଲ୍ଲା ସମବାୟ ବ୍ୟାଙ୍କ ଏକ ମାନହାନି ମାମଲା ରୁଜୁ କରିଛି । ଏହି କେସରେ ରାହୁଲଙ୍କୁ ୨୦୧୯ ଜୁଲାଇରେ ବେଲ ମିଳିଛି । ମୁମ୍ବାଇ କୋର୍ଟରେ ଜଣେ ଆରଏସଏସ କର୍ମୀ ରାହୁଲଙ୍କ ବିରୋଧରେ ମାନହାନି ମାମଲା ରୁଜୁ କରିଥିଲେ । ମହାତ୍ମା ଗାନ୍ଧିଙ୍କୁ ଆରଏସଏସ ହତ୍ୟା କରିଛି ବୋଲି ମନ୍ତବ୍ୟ ଦେଇ ରାହୁଲ ୨୦୧୬ରେ ବିବାଦୀୟ ହୋଇପଡ଼ିଥିଲେ । ଏସମ୍ପର୍କରେ ତାଙ୍କ ବିରୋଧରେ ମହାରାଷ୍ଟ୍ରର ଭିୱାଣ୍ଡି କୋର୍ଟରେ ଏକ ମାନହାନି ମାମଲା ରଜୁ ହୋଇଥିଲା ।