ମାଲକାନଗିରି, (ବଡ଼ ଖବର ବ୍ୟୁରୋ): ମାଲକାନଗିରି ପୋଲିସର ବଡ଼ ସଫଳତା । ଚିତ୍ରକୋଣ୍ଡା ଥାନା ସ୍ୱାଭିମାନ ଅଞ୍ଚଳ ଅନ୍ତର୍ଗତ ପାପୁଲୁର ଅଞ୍ଚଳର ଭୀମରାମ ଜଙ୍ଗଲରେ ମାଓବାଦୀ କାର୍ଯ୍ୟକଳାପ ଚାଲିଥିବା ପୋଲିସକୁ ସୂଚନା ମିଳିଥିଲା । ମଙ୍ଗଳବାର ଗୁଇନ୍ଦା ସୂଚନା ମିଳିବା ପରେ ଏସଓଜି ଓ ବିଏସଏଫ ବାହିନୀ ମିଳିତ କମ୍ବିଂ ଅପରେସନ କରିଥିଲେ। ଯବାନଙ୍କୁ ଆସିବା ଦେଖି ମାଓବାଦୀମାନେ ଗୁଳି ଚଳାଇବାରୁ ଯବାନମାନେ ପାଲଟା ଗୁଳିଚାଳନା କରିଥିଲେ । ଦୀର୍ଘ ୩ଘଣ୍ଟାରୁ ଅଧିକ ସମୟ ଉଭୟ ପକ୍ଷରୁ ଗୁଳି ବିନିମୟ ହୋଇଥିଲା । ଟପ୍ ମାଓବାଦୀ ନେତ୍ରୀ ଅରୁଣାଙ୍କ ସହ ଅନେକ ମାଓବାଦୀ ଘଞ୍ଚ ଜଙ୍ଗଲର ସୁଯୋଗ ନେଇ ଖସି ପଳାଇବାରେ ସକ୍ଷମ ହୋଇଥିଲେ ।
ଯବାନମାନେ ସମ୍ପୃକ୍ତ ଅଞ୍ଚଳରେ ତଲାସି କରିବାରୁ ବିପୁଳ ମାଓବାଦୀ ସାମଗ୍ରୀ ଜବତ ହୋଇଛି। ଜବତ ସାମଗ୍ରୀ ମଧ୍ୟରେ ବିସ୍ଫୋରକ ସହ ଅତ୍ୟାଧୁନିକ ଗୁଳି ରହିଛି। ୧୪ ରାଉଣ୍ଡ ଏସଏଲଆର,ଏକେ-୪୭ ବନ୍ଧୁକର ଅଫୁଟା ଗୁଳି, ୩୨ଟି ଡିଟୋନେଟର, ରେଡିଓ, ଟିଫିନ ବୋମା, ମାଓପୁସ୍ତକ ସହ ମାଓ ୟୁନିଫର୍ମ ଏବଂ ମେଡିସିନ ଜବତ କରାଯାଇଛି। ଆଗାମୀ ଦିନରେ ମଧ୍ୟ ସ୍ୱାଭିମାନ ଅଞ୍ଚଳରେ ଅପରେସନକୁ ଜୋରଦାର କରାଯିବ ବୋଲି ମାଲକାନଗିରି ଏସପି କହିଛନ୍ତି।
