ମରାମତି ହେଉନି ରାସ୍ତା, ଯାତ୍ରୀ ହନ୍ତସନ୍ତ

ଖୋର୍ଦ୍ଧା (ବଡ଼ ଖବର ବ୍ୟୁରୋ): ଲଘୁଚାପ ଜନିତ ଲଗାଣ ବର୍ଷାରେ ଖୋର୍ଦ୍ଧା ନୂଆ ବସଷ୍ଟାଣ୍ଡ ଠାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯାଇଥିବା ରାସ୍ତାରେ ବଡ଼ ବଡ଼ ଖାଲ । ଯାତ୍ରୀମାନେ ହେଉଛନ୍ତି ନାହିଁ ନଥିବା ଅସୁବିଧାର ସମ୍ମୁଖୀନ । ତୁରନ୍ତ ସ୍ଥାୟୀ ମରାମତି ପାଇଁ ଦାବି । ବଙ୍ଗୋପସାଗରରେ ହୋଇଥିବା ଲଘୁଚାପ ଜନିତ ବର୍ଷାରେ ଖୋର୍ଦ୍ଧାର ନୂଆ ବସଷ୍ଟାଣ୍ଡ ଠାରୁ ମୁଖ୍ୟ ଚିକିତ୍ସାଳୟକୁ ସଂଯୋଗ କରୁଥିବା ମୁଖ୍ୟ ରାସ୍ତା ଏବେ ଖାଲ ଢିପରେ ଭର୍ତ୍ତି ହୋଇଛି ।

ରାସ୍ତାରେ ପାଣି ଜମି ରହିବା ଫଳରେ ଯାତାୟତରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏହି ରାସ୍ତା ଦେଇ ନୟାଗଡ, ବୌଦ୍ଧ, କନ୍ଧମାଳ, ବଲାଙ୍ଗୀର ଆଦି ୭ଟି ଜିଲ୍ଲାକୁ ଶହ ଶହ ସଂଖ୍ୟାରେ ଯାନବାହନ ଚଳାଚଳ ହେଉଥିବା ବେଳେ ମୁଖ୍ୟତଃ ଖୋର୍ଦ୍ଧା ଚିକିତ୍ସାଳୟକୁ ଆସୁଥିବା ରୋଗୀମାନେ ଯିବା ଆସିବା କରିବାଦ୍ୱାରା ଦୁର୍ଘଟଣାର ଶିକାର ହେଉଛନ୍ତି ।

ଆଗକୁ ଏହି ରାସ୍ତା ମରାମତି କରିବା ସହିତ କିଭଳି ଭାବରେ ଦୁର୍ଘଟଣାରୁ ବଞ୍ଚିବେ ତାକୁ ଦୃଷ୍ଟି ଦେବାକୁ ସ୍ଥାନୀୟ ଜନସାଧାରଣ ଦାବି କରିଛନ୍ତି । ରାସ୍ତାରେ ବର୍ଷା ଯୋଗୁ ହୋଇଥିବା ଖାଲ ଗୁଡିକୁ ସାମୟିକ ଭାବେ ଅସ୍ଥାୟୀ ମରାମତି କରାଯାଇଛି ଏବଂ ବର୍ଷା ଛାଡିଲା ପରେ ତୁରନ୍ତ ରାସ୍ତାର ସ୍ଥାୟୀ ମରାମତି କରାଯିବ ବୋଲି ପୂର୍ତ୍ତ ବିଭାଗର ଅଧିକାରୀ କହିଛନ୍ତି ।