ସରେଣ୍ଡର କଲା ହାଇଦରର ସାଥୀ ସଲ୍ଲୁ
କଟକ (ବଡ଼ ଖବର ବ୍ୟୁରୋ): ଗ୍ୟାଙ୍ଗଷ୍ଟର ହାଇଦରର ଫେରାର ହେବା ୨ଦିନ ବିତିଗଲାଣି । ଏଯାଏଁ ତାର ଟେର ପାଉନି ପୋଲିସ। ଶନିବାର ସନ୍ଧ୍ୟାରୁ କଟକ ବଡ଼ ମେଡିକାଲରୁ କୁଖ୍ୟାତ ଅପରାଧୀ ହାଇଦର ଫେରାର ହୋଇଯାଇଥିଲା । ତାକୁ ଖୋଜିବା ପାଇଁ ପୋଲିସ ପକ୍ଷରୁ ଗଠନ ହୋଇଛି ଏକାଧିକ ସ୍କ୍ୱାଡ । ଜାରି ରହିଛି ସର୍ଚ୍ଚ ଅପରେସନ ।
କଟକ ସହର ସମେତ କେନ୍ଦ୍ରାପଡ଼ା, ଯାଜପୁର, ଜଗତସିଂପୁର ଜିଲ୍ଲାର ପୋଲିସକୁ ମଧ୍ୟ ଆଲର୍ଟ କରାଯାଇଛି। ରାଜ୍ୟ ରାଜପଥ ଓ ଜାତୀୟ ରାଜପଥର ଉଭୟ ପଟରୁ ଆସୁଥିବା ଗାଡିଗୁଡିକୁ ପୋଲିସ ଅଟକାଇ ତନ ତନ କରି ଯାଞ୍ଚ କରୁଛି। ତଥାପି ହାଇଦରକୁ ଧରିବାରେ ପୋଲିସ ବିଫଳ ହୋଇଛି। ଆଜି ଗ୍ୟାଙ୍ଗଷ୍ଟର ହାଇଦରର ସହଯୋଗୀ ସଲ୍ଲୁ ଓରଫ ୟାକୁବ ଆତ୍ମସମର୍ପଣ କରିଛି।
କଟକ ଚାଉଳିଆଗଞ୍ଜ ଥାନାରେ ସେ ଆତ୍ମସମର୍ପଣ କରିଛି। ପୋଲିସକୁ ପୂରା ସହଯୋଗ କରିବାକୁ କହିଛି ସଲ୍ଲୁ । ସେ ଏସସିବିରେ ହାଇଦରକୁ ବିରିୟାନି ଦେଇଥିଲା । ହାଇଦର ଫେରାର ଘଟଣାରେ ଜେଲ ଡିଆଇଜି ଶୁଭକାନ୍ତ ମିଶ୍ର କହିଛନ୍ତି ପୋଲିସକୁ ତଦନ୍ତରେ ସମସ୍ତ ସହଯୋଗ କରୁଛୁ। ସମ୍ବଲପୁର ଜେଲର କୌଣସି କର୍ମଚାରୀଙ୍କ ବିରୋଧରେ ଅଭିଯୋଗ ଆସିଲେ ତୁରନ୍ତ କାର୍ଯ୍ୟାନୁଷ୍ଠାନ ହେବ ।
