ସରପଞ୍ଚଙ୍କୁ ମରଣାନ୍ତକ ଆକ୍ରମଣ କଲେ ଏସଡିଓ
ବଲାଙ୍ଗୀର (ବଡ଼ ଖବର ବ୍ୟୁରୋ): ସରପଞ୍ଚଙ୍କୁ ପିଟିଲେ ଏସଡିଓ । ହରିଶଙ୍କର ପିଠରେ ଖପ୍ରାଖୋଲ ବ୍ଳକ ସରପଞ୍ଚ ସଂଘ ସଭାପତି ସୁଶୀଲ ଗୁରୁଙ୍କୁ ମରଣାନ୍ତକ ଆକ୍ରମଣ । ଆକ୍ରମଣର ଭିଡିଓ ଏବେ ଭାଇରାଲ ହେବାରେ ଲାଗିଛି । କଣ୍ଟାବାଞ୍ଜି ଗୃହ ଓ ପୂର୍ତ୍ତ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ସିଦ୍ଧାର୍ଥ ଦାସ ସରପଞ୍ଚ ସୁଶୀଲ ଗୁରୁଙ୍କୁ ତଳେ ଚାପି ଆକ୍ରମଣ କରୁଥିବା ଏହି ଭିଡିଓରେ ଦେଖିବାକୁ ମିଳିଛି । ଘଟଣା ଅନୁସାରେ ୧୪ କୋଟି ଖର୍ଚ୍ଚରେ ହରିଶଙ୍କରର ବିକାଶ କାର୍ଯ୍ୟ ଚାଲିଛି । କିନ୍ତୁ ଉନ୍ନୟନ କାମ ନିମ୍ନମାନର ହେଉଥିବା ଚମରିଆ ସରପଞ୍ଚ ସୁଶୀଲ ଅଭିଯୋଗ କରିଥିଲେ ।
ଏପରିକି କାର୍ଯ୍ୟ ସମୟରେ ଯନ୍ତ୍ରୀ ଏବଂ ଅନ୍ୟ ବିଭାଗୀୟ ଅଧିକାରୀ ଉପସ୍ଥିତ ରହୁନଥିବା ଅଭିଯୋଗ କରୁଥିଲେ । ଏହାକୁ ନେଇ ପିଡବ୍ଲ୍ୟୁଡି ଏସଡିଓ ଏବଂ ସୁଶୀଲ ଗୁରୁଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏଥିରେ ଉତ୍ତେଜିତ ହୋଇ ଏସଡିଓ ସିଦ୍ଧାର୍ଥ ସୁଶୀଲ ଗୁରୁଙ୍କୁ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି । ଏପରିକି ଏସଡିଓ ସିଦ୍ଧାର୍ଥ ଏକ ବାଡିରେ ସୁଶୀଲଙ୍କ ବେକକୁ ଚାପିବାକୁ ଉଦ୍ୟମ କରୁଥିବା ଭିଡିଓରେ ସ୍ପଷ୍ଟ ଜଣା ପଡୁଛି । ସୁଶୀଲଙ୍କୁ ଉଦ୍ଧାର କରି ଖପ୍ରାଖୋଲ ଥାନାକୁ ନିଆଯାଇଥିବା ଜଣାପଡିଛି । ଘଟଣା ନେଇ ଉଭୟ ପକ୍ଷ୍ୟରୁ କାହାରି ପ୍ରତିକ୍ରିୟା ମିଳି ପାରି ନାହିଁ ।