ପାଣ୍ଡ୍ୟାଙ୍କୁ ମିଳିବ ମୁମ୍ବାଇ ଇଣ୍ଡିଆନ୍ସ ନେତୃତ୍ୱ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଗୁଜରାଟ ଟାଇଟନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଆସନ୍ତା ଆଇପିଏଲ ସଂସ୍କରଣରେ ନିଜ ପୁରୁଣା ଦଳ ମୁମ୍ବାଇ ଇଣ୍ଡିଆନ୍ସକୁ ଫେରିବେ । ପାଣ୍ଡ୍ୟା ଗୁଜରାଟ ଟାଇଟନ୍ସ ଛାଡିବା ଘଟଣା କ୍ରିକେଟ ପ୍ରେମୀଙ୍କୁ ଚକିତ କରିଛି । ସେ ପୁର୍ନବାର ମୁମ୍ୱାଇ ଇଣ୍ଡିଆନ୍ସକୁ ଯୋଗ ଦେବା ନିଶ୍ଚିନ୍ତ ହୋଇଛି । ଆସନ୍ତାକାଲି ଏ ବିଷୟରେ ଆନୁଷ୍ଠାନିକ ଭାବେ ଘୋଷଣା କରାଯିବ । ପାଣ୍ଡ୍ୟାଙ୍କର ମଧ୍ୟ ଏହି ଡିଲରେ ସହମତି ରହିଛି। କିନ୍ତୁ ଏହା ବଦଳରେ ମୁମ୍ବାଇରୁ କୌଣସି ଖେଳାଳିଙ୍କୁ ଗୁଜରାଟକୁ ଅଦଳବଦଳ କରାଯିବ ନାହିଁ।
ଏହାଫଳରେ ପାଣ୍ଡ୍ୟାଙ୍କ ଆଇପିଏଲ୍ ଫି’ ୧୫ କୋଟି ଟଙ୍କା ସହିତ ଟ୍ରାନ୍ସଫର ଫି’ ଅଲଗା ଭାବେ ଗୁଜରାଟ ଟାଇଟନ୍ସ ପାଇବ। ଅନ୍ୟପଟେ ମୁମ୍ବାଇ ମଧ୍ୟ ପାଣ୍ଡ୍ୟାଙ୍କୁ ତାଙ୍କ ପ୍ରାପ୍ୟ ୧୫ କୋଟି ଟଙ୍କା ପ୍ରଦାନ କରିବାକୁ ସହମତି ଦେଇଛି। ୨୦୨୨ମେଗା ନିଲାମ ପୂର୍ବରୁ ପାଣ୍ଡ୍ୟା ଅଧିନାୟକ ଭାବେ ଗୁଜରାଟ ଟାଇଟନ୍ସରେ ଯୋଗ ଦେଇଥିଲେ । ତାଙ୍କ ନେତୃତ୍ୱରେ ଟାଇଟନ୍ସ ଦଳ ଥରେ ଚାମ୍ପିଅନ ଥରେ ରନର୍ସ ଅପ୍ ହୋଇସାରିଛି । ମାତ୍ର ୨ ବର୍ଷ ମଧ୍ୟରେ ପାଣ୍ଡ୍ୟା ପୁଣିଥରେ ମୁମ୍ବାଇ ଇଣ୍ଡିଆନ୍ସ ଫେରିବାକୁ ମନ ବଳାଇବା କ୍ରିକେଟ ପ୍ରେମୀଙ୍କୁ ଚକିତ କରିଛି । ହାର୍ଦ୍ଦିକ ପାଣ୍ଡ୍ୟା ଟାଇଟନ୍ସ ଛାଡିବା ଫଳରେ ପରବର୍ତ୍ତୀ ଅଧିନାୟକ ଭାବେ ଶୁଭମନ ଗିଲଙ୍କୁ ନିଯୁକ୍ତି ମିଳିବ ବୋଲି ଆଶା କରାଯାଉଛି ।
ସନରାଇଜର୍ସ ହାଇଦ୍ରାବାଦ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ବି ଖେଳାଳି ଅଦଳବଦଳ ହୋଇଛି। ସନରାଇଜର୍ସ ହାଇଦ୍ରାବାଦ ମୟଙ୍କ ଡଗରଙ୍କୁ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ଦେଇ ଶାହବାଜ ଅହମଦଙ୍କୁ ଆଣିଛି। ଦିଲ୍ଲୀର ୨୭ ବର୍ଷୀୟ ଡଗର ଜଣେ ଅଲରାଉଣ୍ଡର। ତାଙ୍କୁ ଗତ ବର୍ଷ ହାଇଦ୍ରାବାଦ ୧.୮ କୋଟି ଟଙ୍କାରେ କିଣିଥିଲା। ବାମହାତୀ ଅଲରାଉଣ୍ଡର ଶାହବାଜଙ୍କୁ ବାଙ୍ଗାଲୋର ୨.୪ କୋଟିରେ କିଣିଥିଲା। ଉଭୟ ଖେଳାଳି ଗତ ସଂସ୍କରଣରେ ସଫଳତା ପାଇ ପାରି ନଥିଲେ।
