ଭୁବନେଶ୍ୱର, (ବଡ଼ ଖବର ବ୍ୟୁରୋ): ଭକ୍ତଙ୍କ ପାଇଁ ଶ୍ରୀମନ୍ଦିର ଖୋଲିବାକୁ ମଙ୍ଗୁନାହାନ୍ତି ସରକାରୀ ବାବୁମାନେ । ଆଗକୁ କାର୍ତ୍ତିକ ମାସ, ହବିଷ ପୁଣି ତା’ ସାଙ୍ଗକୁ ରହିଛି ନାଗାର୍ଜୁନ ବେଶ । ୨୬ବର୍ଷ ପରେ ଏହି ବେଶ ପଡ଼ୁଥିବାରୁ ପ୍ରବଳ ଭକ୍ତ ସମାଗମ ହେବା ନିଶ୍ଚିତ । କୋଭିଡ୍ ଭଳି ସ୍ଥିତିରେ ଏତେ ଭକ୍ତଙ୍କୁ ନିୟନ୍ତ୍ରଣ କରିବା ସରକାରଙ୍କ ପାଇଁ ଅଗ୍ନିପରୀକ୍ଷା ସଦୃଶ । ତେଣେ ଭକ୍ତଙ୍କ ଦର୍ଶନ ବ୍ୟବସ୍ଥାରେ ପାନରୁ ଚୂନ ଖସିଲେ, ସରକାରଙ୍କ ଭାବମୂର୍ତ୍ତି ମଳିନ ପଡ଼ିଯିବ । ଆଗକୁ ନିର୍ବାଚନ ଆସୁଛି ।
ଶ୍ରୀମନ୍ଦିରରେ ଭକ୍ତ ବା ରାଜ୍ୟର ବିଭିନ୍ନ କୋଣରୁ ଆସୁଥିବା ଭକ୍ତଙ୍କର ସମସ୍ୟାକୁ ନେଇ ବିରୋଧୀ ଇସ୍ୟୁ କରିଦେବେ । ତେଣୁ କାଦୁଅକୁ ଯିବେ କାହିଁକି, ଗୋଡ଼ ଧୋଇବେ କାହିଁକି ନ୍ୟାୟରେ ଅନ୍ତତଃ ନାଗାର୍ଜୁନ ବେଶ ପର୍ଯ୍ୟନ୍ତ ଭକ୍ତଙ୍କ ଦର୍ଶନ ବନ୍ଦ ରଖାଯାଇ ପାରିଲେ ଭଲ ବୋଲି ସରକାରୀ ବାବୁମାନେ ଯୋଜନା କରିଛନ୍ତି । ହେଲେ ସରକାରଙ୍କ ପକ୍ଷରୁ ଦର୍ଶନ ବନ୍ଦ କରାଯିବା ନେଇ ନିଷ୍ପତ୍ତି ନିଆଯାଇ ପାରିବ ନାହିଁ । ତେଣୁ ସରକାରୀ ବାବୁମାନଙ୍କ ଭାବନାକୁ ତାଳ ଦେଇ ମତ ଦେଉଛନ୍ତି ସେବକମାନେ ।
୯ ତାରିଖ ୪ଟି ପ୍ରମୁଖ ନିଯୋଗ ସହ ଆଲୋଚନା କରିଥିଲେ ଶ୍ରୀମନ୍ଦିର ପ୍ରଶାସନର ମୁଖ୍ୟ ପ୍ରଶାସକ । ସେହି ଆଲୋଚନା ବେଳେ ବାବୁମାନେ ଯାହା ଭାବୁଛନ୍ତି, ତାହାହିଁ ସେବକ ପ୍ରତିନିଧିମାନେ କହିଛନ୍ତି । ଅନ୍ତତଃ ନାଗାର୍ଜୁନ ବେଶ ପର୍ଯ୍ୟନ୍ତ ଦର୍ଶନ ବନ୍ଦ ରଖିବାକୁ କହିଛନ୍ତି । ବାବୁମାନଙ୍କ ଭାବନା ଓ ସେବକ ପ୍ରତିନିଧିମାନଙ୍କ ମତ ମଧ୍ୟରେ ଏତେ ସମନ୍ୱୟ ଦେଖି ଭକ୍ତମାନେ ଚିନ୍ତାରେ ପଡ଼ିଛନ୍ତି । ବାସ୍ତବରେ ସେବକମାନେ ଚାହୁଁନାହାନ୍ତି ନା ସରକାର?
