ଚାଲିଗଲେ ସୀତାରାମ ୟେଚୁରୀଙ୍କ ପୁଅ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଆଖି ବୁଜିଲେ ଭେଟେରାନ୍ ସିପିଆଇ(ଏମ୍) ନେତା ସୀତାରାମ ୟେଚୁରୀଙ୍କ ବଡ଼ ପୁଅ ଆଶିଷ ୟେଚୁରୀ। କରୋନାରେ ପ୍ରାଣ ହରାଇଛନ୍ତି ବୋଲି ଟ୍ୱିଟ କରି ସୂଚନା ଦେଲେ ନିଜେ ବାପା ସୀତାରାମ ୟେଚୁରୀ। ମୃତ୍ୟୁ ବେଳକୁ ତାଙ୍କୁ ମାତ୍ର ୩୪ ବର୍ଷ ହୋଇଥିଲା । କରୋନା ସଂକ୍ରମିତ ହୋଇ ଗୁରୁଗାଁସ୍ଥିତ ମେଦାନ୍ତ ହସ୍ପିଟାଲରେ ଚିକିତ୍ସିତ ହେଉଥିଲେ । ଦୁଇ ସପ୍ତାହ ତଳେ ଆଶିଷ କରୋନାରେ ଆକ୍ରାନ୍ତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ ।

ତାଙ୍କ ସ୍ୱାସ୍ଥ୍ୟାବସ୍ଥା ଭଲ ଥିଲା ଏବଂ ସେ ସୁସ୍ଥ ହୋଇ ଆସୁଥିଲେ ବୋଲି ତାଙ୍କ ନିକଟ ସମ୍ପର୍କୀୟମାନଙ୍କ ପକ୍ଷରୁ କୁହାଯାଇଛି । ମାତ୍ର ଗୁରୁବାର ସକାଳ ୫.୩୦ରେ ହଠାତ୍ ସେ ଆଖି ବୁଜି ଦେଇଥିଲେ । ସେ ପେଶାରେ ଥିଲେ ଜଣେ ସାମ୍ବାଦିକ । ଚେନ୍ନାଇସ୍ଥିତ ଏସିଆନ୍ କଲେଜ ଅଫ ଜର୍ଣ୍ଣାଲିଜିମରୁ ଉତ୍ତୀର୍ଣ୍ଣ ହୋଇ ଟାଇମସ ଅଫ ଇଣ୍ଡିଆ ସମେତ ବିଭିନ୍ନ ଖବରକାଗଜରେ କାମ କରିଛନ୍ତି । ସେ ପୁନେରେ କାର୍ଯ୍ୟରତ ଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ସବୁ ରାଜନୈତିକ ଦଳର ମାନ୍ୟଗଣ୍ୟ ବ୍ୟକ୍ତି ଆଶିଷଙ୍କ ଅକାଳ ବିୟୋଗରେ ଶୋକପ୍ରକାଶ କରିବା ସହ ଶୋକସନ୍ତପ୍ତ ୟେଚୁରୀ ପରିବାରକୁ ଗଭୀର ସମବେଦନା ଜଣାଇଛନ୍ତି ।