ସାପ ବି କରିପାରେ ରାସ୍ତା ରୋକ

ସୋର (ବଡ଼ ଖବର ବ୍ୟୁରୋ): ଆକ୍ରମଣକାରୀକୁ ଦଣ୍ଡ ଦାବିରେ ସାପ କରିଛି ରାସ୍ତା ରୋକ । ଏଭଳି ଏକ ଅବିଶ୍ୱାସନୀୟ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ସୋର ଅନନ୍ତପୁର ରାସ୍ତାର ଦୁଆମରା ନିକଟରେ । ମନୁଷ୍ୟ ଯେପରି ଅସୁବିଧା ହେଲେ ରାସ୍ତା ରୋକ ଆନ୍ଦୋଳନ କରି ପ୍ରତିବାଦ କରିଥାଏ, ଠିକ ସେହିପରି ଏକ ନାଗ ସାପ ମଧ୍ୟ ରାସ୍ତାରୋକ କରି ପ୍ରତିବାଦ କରୁଥିବା ଦେଖିବାକୁ ମିଳିଛି । କୌଣସି ଏକ ଗାଡ଼ି ଧକ୍କାରେ ସାପଟି ଆହତ ହୋଇଥିଲା ।

ଦୁର୍ଘଟଣା ଘଟାଇଥିବା ଗାଡ଼ି ଚାଳକଙ୍କୁ ପାନେ ଦେବା ପାଇଁ ରାସ୍ତାରୋକ କରିଥିଲା ସାପ । ଫେଣାଟେକି ସାପଟି ରାସ୍ତାରେ ଯାଉଥିବା ବାଇକ୍ ଆରୋହୀଙ୍କୁ ଗୋଡାଇଥିଲା । ଏପରିକି ରାସ୍ତାରେ ଯାନବାହନ ଚଳାଚଳ ଠପ୍ ହୋଇଯାଇଥିଲା । କିଛିି ଉତ୍ସାହି ଯୁବକ ସାପଟିକୁ କାବୁ କରିବା ପରେ ଯାନବାହନ ଚଳାଚଳ ସ୍ୱାଭାବିକ ହୋଇଥିଲା ।