ଜଙ୍ଗଲ ଜମି ବେଆଇନ ଜବରଦଖଲ, ଉପ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଲେ ମହିଳା
ସୋନପୁର (ବଡ଼ ଖବର ବ୍ୟୁରୋ): ଜଙ୍ଗଲ ଜମିକୁ ବେଆଇନ ଜବରଦଖଲ ପ୍ରତିବାଦରେ ଉପ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଲେ ମହିଳା ଗୋଷ୍ଠୀ । ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ବିଶାଳପାଳିର ଜଙ୍ଗଲ ଜମି ସହିତ ଗାଁ ରାସ୍ତାକୁ ପଡୋଶୀ ଗାଁ ଭାଲୁଡ଼ୁଙ୍ଗୁରୀର କିଛି ଅସାଧୁ ଲୋକ ଜୋର ଜବରଦସ୍ତି ଅକ୍ତିଆର କରି ଚାଷ କରୁଛନ୍ତି ।
ଏନେଇ ବିଶାଳପାଳି ଗ୍ରାମବାସୀ ଦୀର୍ଘ ଦିନ ହେବ ପ୍ରଶାସନ ପାଖରେ ଗୁହାରି କରି ଆସୁଛନ୍ତି । ଜବର ଦଖଲ ହଟାଇବା ପାଇଁ ଦାବି କରି ଆସୁଛନ୍ତି । କିଛି ଦିନ ଆଗରୁ ସେହି ସ୍ଥାନରେ ୧୪୪ ଧାରା ମଧ୍ୟ ଲାଗୁ କରିଥିଲା ପ୍ରଶାସନ । ତା ସତ୍ବେ ସେହି ଅସାଧୁ ଲୋକ ମାନେ ପୁଣି ସେହି ଜମିକୁ ଚାଷ କରୁଥିବା ଅଭିଯୋଗ କରିଛନ୍ତି ଗ୍ରାମବାସୀ । ଆଜି ପୁଣି ଉପଜିଲ୍ଲାପାଳଙ୍କୁ ଦାବିପତ୍ର ଦେବା ସହିତ ସମସ୍ୟାର ସମାଧାନ ନହେଲେ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।