ସତ୍ୟବ୍ରତଙ୍କ ତରିକା ଭିନ୍ନ

କାମାକ୍ଷାନଗର, (ବଡ଼ ଖବର ବ୍ୟୁରୋ): ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରଦାନ ପାଇଁ ଅନେକ ସାମାଜିକ ଅନୁଷ୍ଠାନ, ରାଜନୈତିକ ଦଳ ବିଭିନ୍ନ ସମୟରେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି। କିନ୍ତୁ ଆଜିପର୍ୟ୍ୟନ୍ତ ସୁଫଳ ମିଳିପାରି ନାହିଁ। ଅନ୍ୟପଟେ ଏକ ନିଆରା ପଦକ୍ଷେପ ଗ୍ରହଣ କରି ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିଛନ୍ତି ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ ସିନ୍ଧୋଲ ଗ୍ରାମର ସତ୍ୟବ୍ରତ ଦାସ। ରାଜ୍ୟର ୩୧୪ ବ୍ଲକକୁ ପଦଯାତ୍ରା କରି ବିଡିଓମାନଙ୍କ ମାଧ୍ୟମରେ ରାଷ୍ଟ୍ରପତିଙ୍କୁ ଦାବିପତ୍ର ପ୍ରଦାନ କରୁଛନ୍ତି ସତ୍ୟବ୍ରତ। ଗତବର୍ଷ ଜୁଲାଇ ୧୦ରୁ ଆଜିପର୍ୟ୍ୟନ୍ତ ୨୫୬ ବ୍ଲକରେ ପହଞ୍ଚି ନିଜର ଦାବି ଜଣାଇଛନ୍ତି ସେ। ବର୍ତ୍ତମାନ ସୁଦ୍ଧା ପାଖାପାଖି ୮ ହଜାରରୁ ଅଧିକ କିଲୋମିଟର ପଦଯାତ୍ରା କରି ଆଜି କାମାକ୍ଷାନଗର ବ୍ଲକ ଅଫିସରେ ପହଞ୍ଚି ସେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି।