ଶୋଇଛି ବିଦ୍ୟୁତ ବିଭାଗ

ସୋରଡ଼ା, (ବଡ଼ ଖବର ବ୍ୟୁରୋ): ସରକାରୀ ନିୟମ ମାନୁନି ବିଦ୍ୟୁତ ବିଭାଗ। ଫଳରେ ଧନଜୀବନ ବିପନ୍ନ ହେଉଛି। ସରକାରୀ ନିୟମ ଅନୁସାରେ ବିଦ୍ୟୁତ୍ ତାରର ଉଚ୍ଚତା ଅତି କମରେ କୋଡ଼ିଏ ଫୁଟ ଉଚ୍ଚରେ ରହିବା କଥା। କିନ୍ତୁ ଗଞ୍ଜାମ ଜିଲ୍ଲା ସୋରଡ଼ା ସହରରେ ସମ୍ପୂର୍ଣ୍ଣ ଓଲଟା। ସହରର ରଥପଦା ଛକରେ ଥିବା ଜଗନ୍ନାଥ ମନ୍ଦିର ପ୍ରାଙ୍ଗଣ ବିଦ୍ୟୁତ୍ ଖୁଣ୍ଟରେ ବିଣ୍ଡା ବିଣ୍ଡା ହୋଇ ବନ୍ଧା ହୋଇଛି ବିଦ୍ୟୁତ୍ ତାର। ରାତି ପାହିଲେ ମନ୍ଦିରକୁ ଆସିଥାନ୍ତି ଶହ ଶହ ଶ୍ରଦ୍ଧାଳୁ। ବିପଦସଙ୍କୁଳ ଅବସ୍ଥାରେ ଏହି ତାରଗୁଡ଼ିକ ଥିବାରୁ କେତେବେଳେ କାହାର ଜୀବନ ଚାଲିଯିବ କହିବା ମୁସ୍କିଲ। ବାରମ୍ବାର ବିଦ୍ୟୁତ ବିଭାଗକୁ ଅବଗତ କରାଗଲେ ମଧ୍ୟ ସୁଫଳ ମିଳୁନି। ବିଦ୍ୟୁତ ବିଭାଗ ଶୋଇଥିବାରୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଲାଗିରହିଛି।