ଗୁଳିକରି ଲୁଚିଛନ୍ତି ଆତଙ୍କୀ!

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବିଶ୍ୱ ଦେଖିଲା ଆତଙ୍କବାଦୀଙ୍କ ନରସଂହାର । ପହଲଗାମ ଆକ୍ରମଣରେ ୨୬ ଲୋକଙ୍କ ମୃତୁ୍ୟ । ବଦଲା ନେବାକୁ ଏବେ ଅଣ୍ଟା ଭିଡିଛି ଭାରତ । ସରକାରଙ୍କ ପକ୍ଷରୁ ଚାଲିଛି ଘନଘନ ବୈଠକ । ତିନି ସେନାର ମୁଖ୍ୟକୁ ପୂର୍ଣ୍ଣ କ୍ଷମତା ଦିଆଯାଇଛି । ସାରା ଦେଶରେ ଏବେ ପ୍ରତିଶୋଧର ନିଆଁ ଜଳୁଛି । ହେଲେ ଆଖିକୁ ଦେଖାଗଲା ଭଳି ପଦକ୍ଷେପ ନିଆଯାଇନାହିଁ । ଏହାରି ଭିତରେ ଖବର ଆସୁଛି ଯେ ଆତଙ୍କବାଦୀମାନେ ଏବେ ବି ଆକ୍ରମଣ ଅଂଚଳରେ ଲୁଚି ରହିଛନ୍ତି । ଦକ୍ଷିଣ କାଶ୍ମୀରେ ଏବେ ବି ଆକ୍ଟିଭ ଅଛନ୍ତି ।

ଖାଇବା, ବୁଲିବା ସହ ଲୋକଙ୍କ ସହ ମିଶୁଛନ୍ତି । ଜାତୀୟ ତଦନ୍ତକାରୀ ସଂସ୍ଥା ଏନଆଇଏ ଏନେଇ ବଡ଼ ଖୁଲାସା କରିଛି । ପହଲଗାମରେ ନାରକୀୟକାଣ୍ଡ ଭିଆଇଥିବା ଆତଙ୍କୀମାନେ ବାହାରକୁ ଯାଇନାହାନ୍ତି । ଦକ୍ଷିଣ କାଶ୍ମୀରେ ସେମାନେ ଏବେ ବି ଲୁଚି ରହିଛନ୍ତି । ସେମାନଙ୍କ ସହ ଅନ୍ୟ ଆତଙ୍କବାଦୀମାନେ ମଧ୍ୟ ଅଛନ୍ତି । ଯାହା କିଛି କାର୍ଯ୍ୟକଳାପ ଚାଲିଛି ସେ ସବୁ ନଜରକୁ ନେଉଛନ୍ତି । ଗୁରୁବାରର ଏନଆଇଏ ଟିମ୍ ପହଲଗାମ ଯାଇ ତଦନ୍ତ କରିଛନ୍ତି । ତଦନ୍ତ ପରେ ଏଭଳି କିଛି ତଥ୍ୟା ସାମ୍ନାକୁ ଆସିଥିବା ଜଣାପଡ଼ିଛି ।

ଯେଉଁ ଆତଙ୍କବାଦୀମାନେ ଆକ୍ରମଣ କରିଛନ୍ତି ସେମାନେ ସମସ୍ତେ ହାଫିଜ ସଇଦ ଆତଙ୍କୀ ସଙ୍ଗଠନ ଲସ୍କର-ଏ-ତୋଇବାର ସଦସ୍ୟ କୁହାଯାଉଛି । ଏକାଧିକ ହମଲାରେ ସେମାନଙ୍କ ହାତ ରହିଛି । ଆତଙ୍କବାଦୀମାନେ ଆତଙ୍କ ଭିଆଇବା ପୂର୍ବରୁ ରେକି କରିଥିଲେ । ପହଲଗାମରେ ଆତଙ୍କ ଭିଆଇଲେ ଅଧିକ ଲୋକଙ୍କ ଜୀବନ ନେଇହେବ ଭାବି ସେମାନେ ଆକ୍ରମଣ କରିଥିଲେ । ଫଳରେ ୨୬ ଲୋକଙ୍କ ଜୀବନ ଯାଇଛି । ଏହାର ବଦଲା ନେବାକୁ ଭାରତୀୟ ସେନା ପ୍ରସ୍ତୁତ ହେଉଥିବା କୁହାଯାଉଛି ।