ଜମିବାଡ଼ି ବିବାଦକୁ ନେଇ ଦମ୍ପତି ପିଇଲେ ବିଷ

ମହାକାଳପଡା (ବଡ଼ ଖବର ବ୍ୟୁରୋ): ଜମିବାଡ଼ି ବିବାଦକୁ ନେଇ ଦମ୍ପତି ପିଇଲେ ବିଷ । ଏଭଳି ଅଭାବନୀୟ ଘଟଣା କେନ୍ଦ୍ରାପଡା ଜିଲ୍ଲା ମହାକାଳପଡ଼ା ଲାଂଜୁଡା ପଂଚାୟତର ଦୋଳି ଗାଁରେ ଦେଖିବାକୁ ମିଳିଛି । ଜମିବାଡି ବିବାଦକୁ କେନ୍ଦ୍ରକରି ଦୋଳି ଗ୍ରାମର ପୁରୁଷୋତ୍ତମ ସ୍ୱାଇଁ ଓ ତାଙ୍କ ସ୍ତ୍ରୀ ବିଷପିଇ ଆତ୍ମହତ୍ୟା ଉଦ୍ୟମ କରିଥିଲେ । ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।

ଏହି ପରିବାରକୁ ଗ୍ରାମବାସୀ ସାମାଜିକ ବାସନ୍ଦ କରିଥିଲେ । ପୁରୁଷୋତ୍ତମ ସ୍ୱାଇଁଙ୍କ ଦୀର୍ଘ ଦିନର ଦଖଲ ଜମିକୁ ଅନ୍ୟ ବ୍ୟକ୍ତି ଜଣେ ଅଧିକାର କରୁଥିଲେ । ବିରୋଧ କରିଥିଲେ ପୁରୁଷୋତ୍ତମ । ଥାନାରେ ଦେଇଥିଲେ ଏତଲା । ପୋଲିସ ନୀରବ ରହିବାରୁ ବହୁଥର ଗ୍ରାମ୍ୟ କମିଟିର ବୈଠକ ହୋଇଥିଲା । ମାତ୍ର ସମାଧାନର ସୂତ୍ର ବାହାରିନଥିଲା । ସବୁଆଡୁ ନିରାଶ ହେବା ପରେ ପୁରୁଷୋତ୍ତମ ଓ ତାଙ୍କ ସ୍ତ୍ରୀ ବିଷ ପିଇ ଦେଇଥିଲେ ।