ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟରେ ପୌର ନିର୍ବାଚନ ପାଇଁ ବାଟ ଫିଟିଛି । ୱାର୍ଡ ପୁର୍ନଗଠନ ଓ ସଂରକ୍ଷଣ ସଂକ୍ରାନ୍ତ ଫାଇଲରେ ରାଜ୍ୟପାଳ ଦସ୍ତଖତ କରିବା ପରେ ଆଇନ ବିଭାଗ ତତ୍ପର ହୋଇ ଉଠିଛି । ସଂରକ୍ଷଣ ୫୦ ପ୍ରତିଶତରୁ ଯେପରି ଅଧିକ ନହେବ ସେଥିପାଇଁ ଚାଲିଛି ଉଦ୍ୟମ । ଏକକାଳୀନ ପୌର ଓ ପଞ୍ଚାୟତ ନିର୍ବାଚନ ହେବ କି ନାହିଁ, ସରକାରୀଭାବେ କୌଣସି ନିଷ୍ପତ୍ତି ନିଆଯାଇ ନାହିଁ ।
ପୌର ଆଇନରେ ସଂଶୋଧନକୁ ଗତ ସପ୍ତାହରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ଅନୁମୋଦନ ଦେଇଥିଲେ । ଏହାପରେ ଆଇନ ବିଭାଗ ପକ୍ଷରୁ ଗେଜେଟ୍ ନୋଟିସ୍ ଜାରି ହୋଇଛି । ଗେଜେଟ୍ ବିଜ୍ଞପ୍ତି ପରେ ଏବେ ନଗର ଉନ୍ନୟନ ବିଭାଗ କେବେ ପୌର ନିର୍ବାଚନ ପାଇଁ ପ୍ରକ୍ରିୟା ଘୋଷଣା କରିବ ତାଉପରେ ସବୁ ରାଜନୈତିକ ଦଳଙ୍କର ନଜର ରହିଛି ।
ପୌର ନିର୍ବାଚନରେ ୱାର୍ଡ ପୁନର୍ଗଠନ ସହ ସଂରକ୍ଷଣ କରାଯିବ । ଏଥିପାଇଁ ୨ରୁ ୩ ମାସ ସମୟ ଲାଗିପାରେ । ଆଗକୁ ପଞ୍ଚାୟତ ନିର୍ବାଚନ ରହିଛି । ପଞ୍ଚାୟତ ଭୋଟ ଉପରେ ସରକାର ଫୋକସ କରୁଛନ୍ତି । ତେଣୁ ଆଶା କରାଯାଉଛି କମ୍ ସମୟ ଭିତରେ ପୌର ନିର୍ବାଚନ କରିବା ସମ୍ଭବ ହୋଇ ନପାରେ । ଆସନ୍ତାବର୍ଷ ଜୁନ୍ ବେଳକୁ ହୋଇପାରେ ପୌର ନିର୍ବାଚନ ।
