ଚାଷୀ ଅଛି ଚାଷ ବି ଅଛି, ହେଲେ କେନାଲରେ ପାଣି ନାହିଁ

ପାଟକୁରା (ବଡ଼ ଖବର ବ୍ୟୁରୋ): ଚାଷୀ ଅଛନ୍ତି, ଚାଷ ଅଛି, କେନାଲ ବି ଅଛି ହେଲେ କେନାଲରେ ପାଣି ନାହିଁ । ଯାହା ଫଳରେ କେନାଲ ପାଣି ଉପରେ ନିର୍ଭରଶୀଳ ଚାଷିମାନଙ୍କ ଅବସ୍ଥା କହିଲେ ନସରେ। ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କୃଷି ପ୍ରଧାନ କେନ୍ଦ୍ରାପଡ଼ା ଜିଲ୍ଲାର ଗରଦପୁର ତହସିଲ ଅଞ୍ଚଳରେ। ଏମ୍ ସି ଆଇ ଆଇ ଅଧିନରେ ଖୋଳା ଯାଇଥିବା ଚିତ୍ରୋପ୍ତଳା ନଦୀର ଦକ୍ଷିଣ ପାର୍ଶ୍ଵ ମୁଖ୍ୟ କେନାଲ ମଧ୍ୟରୁ ବାହାରିଥିବା ଶାଖା କେନାଲ, ମଇଦିପୁର୍-ଚାଉଳିଆ କେନାଲଟି ମୁଖ୍ୟ କେନାଲ୍ ଠାରୁ ଉଚ୍ଚାରେରେ ଥିବାରୁ ଏଥି ମଧ୍ୟକୁ ପାଣି ଆସିପାରୁ ନାହିଁ।

ଯାହା ଫଳରେ ଚାଷୀ ରୁଆ ବେଉସା କରି ନ ପାରି ବର୍ଷକର ଆହାର ଚିନ୍ତାରେ ମୁଣ୍ଡରେ ହାତ ଦେଇ ବସିଛି। ପ୍ରତି ବର୍ଷ କେନାଲ ସଫେଇ ନାମରେ କୋଟି କୋଟି ଟଙ୍କା ହରିଲୁଟ୍ କରାଯାଉଥିବା ବେଳେ କେନାଲର ଲେବୁଲ୍ ପ୍ରତି ଦୃଷ୍ଟି ଦିଆଯାଉ ନ ଥିବାରୁ ଏପରି ପରିସ୍ଥିତି ସୃଷ୍ଟି ହେଉଛି ବୋଲି କ୍ଷୋଭ ପ୍ରକାଶ କରିଛନ୍ତି ଅଞ୍ଚଳର ଚାଷୀ ଓ ବୁଦ୍ଧିଜୀବୀ । କେନାଲ ଖନନ ବେଳେ ବିଭାଗୀୟ ଯନ୍ତ୍ରୀ ଓ ଉପରିସ୍ଥ ଅଧିକାରୀମାନଙ୍କ ଅନୁପସ୍ଥିତି ଓ ଦୂରଦୃଷ୍ଟିର ଅଭାବ ଯୋଗୁଁ ଏପରି ପରିସ୍ଥିତି ସୃଷ୍ଟି ହୋଇଥିବା କୁହାଯାଉଥିବା ବେଳେ ଖବର ପ୍ରସାରଣ ପରେ ରାଜ୍ୟ ସରକାର ଓ ବିଭାଗୀୟ ଅଧିକାରୀ ଅନ୍ନଦାତାଙ୍କ ସ୍ଵାର୍ଥକୁ ଦୃଷ୍ଟି ରେ ରଖି କି ପ୍ରକାର ପଦକ୍ଷେପ ନେଉଛନ୍ତି ଦେଖିବାର ବାକି ରହିଲା ।