କରଞ୍ଜିଆରେ ବାଘ ଆତଙ୍କ

କରଞ୍ଜିଆ (ବଡ଼ ଖବର ବ୍ୟୁରୋ): କରଞ୍ଜିଆ ବନଖଣ୍ଡ ଅଧିନ ଠାକୁରମୁଣ୍ଡା ରେଞ୍ଜ ଅଞ୍ଚଳର କାଳିଆଜିଆଣୀ ଗାଁ ନିକଟ ସଂରକ୍ଷିତ ଜଙ୍ଗଲକୁ ଶିମିଳିପାଳ କୋର ଏରିଆରୁ ଏକ ମହାବଳ ବାଘ ଚାଲି ଆସିଥିବାରୁ ବାଘକୁ ନେଇ ଠାକୁରମୁଣ୍ଡା ଅଞ୍ଚଳରେ  ଭୟ ଲାଗି ରହିଛି । ତେବେ ବର୍ତ୍ତମାନ ସୁଦ୍ଧା କେହି ବାଘକୁ ନ ଦେଖିଥିଲେ ମଧ୍ୟ ବାଘର ପାଦ ଚିହ୍ନ ହିଁ ଅଞ୍ଚଳରେ ତାର ଗତିବିଧି ସଂକ୍ରାନ୍ତରେ ସ୍ପଷ୍ଟ ପ୍ରମାଣ ଦେଇଛି । ଯାହାକୁ ନେଇ ବିଶେଷ କରି ହାତୀ ଘୋଡା ଓ ସାଲେଇବେଡା ପଞ୍ଚାୟତର ଆଖପାଖ ଗ୍ରାମଗୁଡିକରେ କୋକୁଆ ଭୟ ଅଧିକ ଦେଖାଯାଇଛି।

ଗାଁ ମୁହାଁ ହୋଇ ବାଘ ଆସିଥିବାର ଖବର ପାଇବା ପରେ ସମ୍ପୃକ୍ତ ଅଞ୍ଚଳରେ ବନକର୍ମଚାରୀମାନେ ପହଞ୍ଚି ସ୍ଥିତିକୁ ନିୟମିତ ଅନୁଧ୍ୟାନ କରୁଛନ୍ତି । ତେବେ ବନ ବିଭାଗର କହିବା ଅନୁଯାୟୀ ବାଘର ଗତିବିଧି ନଜର ରଖିବା ପାଇଁ ଜଙ୍ଗଲରେ ୨୦ ରୁ ଉର୍ଦ୍ଧ୍ବ କେମେରା ଲଗା ଯାଇଛି । ଗତକାଲି ଠାରୁ ବାଘ ବୁଲୁଥିବା ଅଞ୍ଚଳରେ ଡାକବାଜି ଦ୍ୱାରା ଲୋକଙ୍କୁ ସଚେତନ କରିବାର କାର୍ୟ୍ୟକ୍ରମ ଆରମ୍ଭ କରିଛି ବନ ବିଭାଗ । ଅନ୍ୟପଟେ ବନ ବିଭାଗର କର୍ମଚାରୀ ଓ ବାଘଙ୍କ ସୁରକ୍ଷା ପାଇଁ ରହିଥିବା ବିଭିନ୍ନ ବ୍ୟବସ୍ଥା ଜରିଆରେ ବାଘର ଗତିବିଧିକୁ ନେଇ ଏକ ସ୍ୱତନ୍ତ୍ର ଟିମ କାର୍ୟ୍ୟ କରୁଥିବା ନେଇ ସୂଚନା ଦେଇଛନ୍ତି କରଞ୍ଜିଆ ଡ଼ିଏଫଓ ।