କାଲିଠୁ ଖୋଲୁଛି ନଡ଼ିଆ ରାଣୀଙ୍କ ଦ୍ୱାର

ଘଟଗାଁ(ବଡ଼ ଖବର ବ୍ୟୁରୋ): ଆସନ୍ତା କାଲି ମା’ ତାରିଣୀ ମନ୍ଦିର ଖୋଲିବାକୁ ଯାଉଛି । ମା’ଙ୍କ ଦର୍ଶନ ନେଇ ମନ୍ଦିର ପ୍ରଶାସନ ଗାଇଡଲାଇନ ଜାରି କରିଛି। ସମସ୍ତ ଭକ୍ତଙ୍କ ପାଇଁ ମାସ୍କ ବାଧ୍ୟତାମୂଳକ କରାଯାଇଛି। ସାଧାରଣ ଦର୍ଶନ ପାଇଁ ସକାଳ ୮ରୁ ଆରମ୍ଭ ହୋଇ ମଧ୍ୟାହ୍ନ ୧୨ଟା ୩୦ମିନିଟ୍ ପର୍ଯ୍ୟନ୍ତ ଏବଂ ଅପରାହ୍ନ ୪ଟାରୁ ସନ୍ଧ୍ୟା ୬ଟା ୩୦ମିନିଟ୍ ପର୍ଯ୍ୟନ୍ତ ରହିବ । ଭକ୍ତମାନେ ଗେଟ୍ ନଂ-୩ରେ ପ୍ରବେଶ କରିବେ। ସାନିଟାଇଜ ହୋଇ ସାମାଜିକ ଦୂରତା ରକ୍ଷାକରି ବ୍ୟାରିକେଡରେ ପ୍ରବେଶ କରି ମୁଖଶାଳା ଦେଇ ମନ୍ଦିର ମଧ୍ୟକୁ ପ୍ରବେଶ କରିବେ । ମନ୍ଦିର ବେଢା ମଧ୍ୟରେ ଏକା ସାଙ୍ଗରେ ୨୫ ରୁ ୩୦ ଜଣ ଭକ୍ତ ଦର୍ଶନ କରିପାରିବେ। ମନ୍ଦିର ମଧ୍ୟରେ କୌଣସି ଭୋଗ ଅର୍ଥାତ୍ ନଡିଆ, ପୁଷ୍ପ, ଦୀପ, ଧୂପ ଇତ୍ୟାଦି ଲାଗି କରାଯିବ ନାହିଁ । କେବଳ ଭକ୍ତମାନେ ମା’ଙ୍କ ଦର୍ଶନ କରିପାରିବେ । କୌଣସି ଭକ୍ତ ପାଦୁକା ସେବନ କରିବେ ନାହିଁ କିମ୍ବା ସିନ୍ଦୁର, ଚନ୍ଦନ ଲଗାଇବେ ନାହିଁ।

ସବୁଠୁ ବଡ଼ କଥା ହେଉଛି ମନ୍ଦିରକୁ ୧୦ ବର୍ଷରୁ କମ୍ ବୟସର ପିଲାଙ୍କୁ ବାରଣ କରାଯାଇଛି। ଏଥିସହିତ ମାନସିକ ଚୂଳ ସମର୍ପଣକୁ ମଧ୍ୟ ବନ୍ଧ କରାଯାଇଛି । ତେବେ ସବୁ ନିୟମ ମାନି ଭକ୍ତ ମାନେ ମା’ ତାରିଣୀଙ୍କ ଦର୍ଶନ କରିପାରିବେ ବୋଲି ମନ୍ଦିର ଟ୍ରଷ୍ଟବୋର୍ଡ ପକ୍ଷରୁ ପ୍ରେସ ରିଲିଜକରି ସୂଚନା ଦିଆଯାଇଛି।