ଯାଜପୁର(ବଡ଼ ଖବର ବ୍ୟୁରୋ): ସରକାରଙ୍କ କଥା ଓ ବାସ୍ତବ ଚିତ୍ର ପୁରା ଅଲଗା । ସ୍ୱାସ୍ଥ୍ୟ କ୍ଷେତ୍ରରେ ଦେଖିବାକୁ ମିଳୁଛି ଅବ୍ୟବସ୍ଥା । ୫ଥରର ବିଧାୟିକାଙ୍କ ଅଞ୍ଚଳରେ ନାହାନ୍ତି ଡାକ୍ତର । ଆୟୁଷ ଡାକ୍ତରରେ ଚାଲିଛି ସ୍ୱାସ୍ଥ୍ୟ ସେବା । ଜନତାଙ୍କୁ ମିଳୁନି ସ୍ୱାସ୍ଥ୍ୟ ସେବା ଭଳି ମୌଳିକ ସୁବିଧା । ଏଭଳି ଆଉ କେତେଦିନ ଚାଲିବ ବୋଲି ଲୋକେ କଲେଣି ପ୍ରଶ୍ନ । ଯାହାର ନଗ୍ନ ଚିତ୍ର ଦେଖିବାକୁ ମିଳିଛି ଯାଜପୁର ଜିଲ୍ଲା ବିଂଝାରପୁର ବ୍ଲକରେ । ବ୍ଲକର ଏକାଧିକ ପ୍ରାଥମିକ ମେଡିକାଲରେ ନାହାନ୍ତି ଡାକ୍ତର । ପ୍ରୀତିପୁର ମେଡିକାଲରେ ଡାକ୍ତର ଅଛନ୍ତି, ହେଲେ ମେଡିକାଲ ଆସୁନାହାନ୍ତି । ଫଳରେ ଫାର୍ମାସିଷ୍ଟ ହାତରେ ରୋଗୀ ଜୀବନ ।
ଅନ୍ୟପଟେ ଡାକ୍ତରଙ୍କୁ ଫୋନ କଲେ ଉତ୍ତର ମିଳୁଛି ମୁଁ ଛୁଟିରେ ଅଛି । ଆଉ କେତେବେଳେ ବାଟରେ ଯାଉଛି ବୋଲି ଉତ୍ତର ଆସୁଛି । ସେହିପରି ମେଡିକାଲରେ କୋଭିଡ ଟିକାକରଣ ହେଉଥିଲେ ମଧ୍ୟ ଦେଖିବାକୁ ମିଳିନଥିଲା ଡାକ୍ତରଙ୍କୁ । ଏନେଇ ବିଝାରପୁର ଇନଚାର୍ଜଙ୍କୁ ପଚାରିବାରୁ ମିଳିନଥିଲା ସଠିକ ଉତ୍ତର । ଅନ୍ୟପଟେ ସିଡିଏମଓଙ୍କୁ ଫୋନ କରିବାରୁ ମେଡିକାଲ ଇନଚାର୍ଜ ଜାଣିଥିବେ ବୋଲି ଉତ୍ତର ମିଳିଥିଲା । ପ୍ରଶ୍ନ ଉଠୁଛି ଯଦି ଏଭଳି ସ୍ୱାସ୍ଥ୍ୟ ସେବା ଚାଲେ ତେବେ ଲୋକେ କିଭଳି ଉପକୃତ ହେଉଥିବେ ତାହା ସମସ୍ତଙ୍କୁ ଜଣା ।
