ଶପଥ ପରେ ଆକ୍ସନ୍ ମୋଡ୍ରେ ବିଜୟ
ଚେନ୍ନାଇ (ବଡ଼ ଖବର ବ୍ୟୁରୋ):ତାମିଲନାଡୁ ରାଜନୀତିରେ ଏକ ନୂତନ ଯୁଗର ଆରମ୍ଭ ହୋଇଛି। ଚେନ୍ନାଇର ନେହରୁ ଷ୍ଟାଡିୟମରେ ଆୟୋଜିତ ଏକ ଭବ୍ୟ ତଥା ଐତିହାସିକ ଉତ୍ସବରେ ସୁପରଷ୍ଟାର ଥାଲାପତି ବିଜୟ ତାମିଲନାଡୁର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆରଲେକର ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି। ୧୯୬୭ ମସିହା ପରେ ବିଜୟ ପ୍ରଥମ ‘ଅଣ-ଦ୍ରାବିଡ଼’ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରି ଏକ ନୂଆ ଇତିହାସ ରଚିଛନ୍ତି।
ଏହି କାର୍ୟ୍ୟକ୍ରମରେ ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ସମେତ ଅନେକ ବରିଷ୍ଠ ନେତା ଉପସ୍ଥିତ ରହିଥିଲେ। ବିଜୟଙ୍କ ସହ ପ୍ରଥମ ପର୍ୟ୍ୟାୟରେ ୯ ଜଣ ମନ୍ତ୍ରୀ ଶପଥ ନେଇଛନ୍ତି । ବିଜୟଙ୍କ ଦଳ ‘ତାମିଲଗା ଭେଟ୍ରି କାଡ଼ଗମ’ ଏକକ ସଂଖ୍ୟାଗରିଷ୍ଠତା ପାଇନଥିଲେ ମଧ୍ୟ କଂଗ୍ରେସ, CPI, CPI-M, VCK ଏବଂ IUML ର ସମର୍ଥନରେ ୧୨୦ ବିଧାୟକଙ୍କ ସହ ମେଣ୍ଟ ସରକାର ଗଠନ କରିଛନ୍ତି।
ତାମିଲନାଡୁର ନୂତନ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ଆଜି ପଦଭାର ଗ୍ରହଣ କରିବା ସହିତ ନିଜ ନିର୍ବାଚନୀ ପ୍ରତିଶ୍ରୁତି ପୁରଣ ଦିଗରେ ଦ୍ରୁତ ଗତିରେ କାମ ଆରମ୍ଭ କରିଦେଇଛନ୍ତି । ଶପଥ ନେବାର କିଛି ସମୟ ପରେ ସେ ଅନେକ ଗୁରୁତ୍ୱପୂର୍ଣ୍ଣ ଫାଇଲରେ ସହି କରି ସ୍ପଷ୍ଟ ସଙ୍କେତ ଦେଇଛନ୍ତି ଯେ, ତାଙ୍କ ସରକାର ଜନତାଙ୍କୁ ଦିଆଯାଇଥିବା ପ୍ରତିଶ୍ରୁତିକୁ ପ୍ରାଥମିକତା ଦେବ । ବିଜୟ ସର୍ବପ୍ରଥମେ ଘରୋଇ ଉପଭୋକ୍ତାଙ୍କୁ ୨୦୦ ୟୁନିଟ୍ ମାଗଣା ବିଦ୍ୟୁତ୍ ଯୋଗାଇବା ଯୋଜନାକୁ ଅନୁମୋଦନ କରିଛନ୍ତି । ଏହା ତାଙ୍କ ନିର୍ବାଚନ ପ୍ରଚାରର ସବୁଠାରୁ ବଡ଼ ପ୍ରତିଶ୍ରୁତିମାନଙ୍କ ମଧ୍ୟରୁ ଗୋଟିଏ ଥିଲା । ଏହା ସହ ସେ ମହିଳାମାନଙ୍କ ସୁରକ୍ଷା ପାଇଁ ଏକ ବିଶେଷ ସୁରକ୍ଷା ବଳ ଗଠନ ସମ୍ପର୍କିତ ଫାଇଲରେ ମଧ୍ୟ ସହି କରିଛନ୍ତି ।