ରାଜଧାନୀରେ ପ୍ରବଳ ବର୍ଷା; ବିଭିନ୍ନ ସ୍ଥାନରେ ଦେଖାଦେଇଛି ଜଳବନ୍ଦୀ ସ୍ଥିତି
ଭୁବନେଶ୍ୱର (ବଡ଼ ଖବର ବ୍ୟୁରୋ): ବର୍ଷାରେ ବେହାଲ ଭୁବନେଶ୍ୱର-କଟକ । ରାଜଧାନୀରେ ପ୍ରବଳ ବର୍ଷା ଲାଗି ରହିଥିବା ବେଳେ ବିଭିନ୍ନ ସ୍ଥାନରେ ଜଳବନ୍ଦୀ ସ୍ଥିତି ଦେଖାଦେଇଛି । ରାସ୍ତା ଉପରେ ଚାଲୁଛି ପାଣି । ସହର ସାରା ଜଳବନ୍ଦୀ ସ୍ଥିତି ଲାଗି ରହିଥିବା ବେଳେ ଜନଜୀବନ ବାଧାପ୍ରାପ୍ତ ହୋଇଛି । ଲୋକେ ଅଫିସ କାମ ହେଉ କିମ୍ବା ଦୈନ୍ୟନ୍ଦିନ କାମକୁ ଯିବା ପାଇଁ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି ।ଲଗାଣ ବର୍ଷା ଯୋଗୁଁ ଇସ୍କନ ମନ୍ଦିର ସାମ୍ନାରେ ମଧ୍ୟ ପାଣି ଜମିଥିଲା ।
ସେହିପରି କଟକ ସହରର ବିଭିନ୍ନ ସ୍ଥାନରେ ବର୍ଷା ଯୋଗୁଁ ନାଳ ଫୁଲ୍ ହୋଇ ରାସ୍ତାରେ ପାଣି ଚାଲିଛି । ପ୍ରଥମେ କଟକ ସହର ଜଳମୟ ହେଉଥିଲା, ମାତ୍ର ଆଜି ଜଳମୟ ସହିତ ଜାଇକାର କାର୍ୟ୍ୟ ପାଇଁ କାଦୁଅ ମୟ ଓ ପଙ୍କ ଉଦ୍ଧାର ପରେ ସଫା ନହେବା ଯୋଗୁଁ ପଙ୍କମୟ ହେଉଛି । ସିଏମସିର ଅପାରଗତା ଓ ଜନପ୍ରତିନିଧି ମାନଙ୍କ ଅବହେଳା ଯୋଗୁଁ ସାଧାରଣ ଜନତା ନାହିଁ ନଥିବା ସୁବିଧାର ସମ୍ମୁଖିନ ହେଉଛନ୍ତି ।