ବିରାଟକାୟ ଅହିରାଜ ଉଦ୍ଧାର

ମୋହନା (ବଡ଼ ଖବର ବ୍ୟୁରୋ): ଗଜପତି ଜିଲ୍ଲା ପାରଳାଖେମୁଣ୍ଡି ବନଖଣ୍ଡ ଚନ୍ଦ୍ରଗିରି ବନାଞ୍ଚଳର ଚାନ୍ଦିପୁଟ ଉଚ୍ଚ ପ୍ରାଥମିକ ବିଦ୍ୟାଳୟ ଫାଟକ ସମ୍ମୁଖରୁ ଏକ ବିରାଟ ଅହିରାଜ ସାପ ଉଦ୍ଧାର କରାଯାଇଛି । ଅହିରାଜ ସାପର ଲମ୍ବ ପ୍ରାୟ ୧୩ ଫୁଟ ହୋଇଥିବା କୁହାଯାଇଛି । ସ୍କୁଲ ସମ୍ମୁଖ ଡ୍ରେନରେ ଦୁଇଦିନ ଧରି ରହିଥିଲା । ସାପକୁ ଦେଖି ସ୍ଥାନୀୟ ଲୋକେ ଆତଙ୍କିତ ହେବା ସହ ବନବିଭାଗକୁ ଜଣାଇଥିଲେ । କିନ୍ତୁ ବନବିଭାଗ କୌଣସି ପଦକ୍ଷେପ ନ ନେବାରୁ ସ୍ଥାନୀୟ ଲୋକେ ସ୍ନେକ୍ ହେଲ୍ପ ଲାଇନକୁ ଖବର ଦେଇଥିଲେ। ବ୍ରହ୍ମପୁର ସ୍ନେକ ହେଲ୍ପ ଲାଇନର ସଦସ୍ୟ ସକାଳୁ ସାପଟିକୁ ଉଦ୍ଧାର କରିଥିଲେ । ଉଦ୍ଧାର କାର୍ଯ୍ୟରେ ଶ୍ରୀକାନ୍ତ ନାହାକ, ସ୍ୱାଧୀନ ସାହୁ, ଶୁଭମ ସାହୁ, ଶ୍ରୀକାନ୍ତ ସାହୁ ସହଯୋଗ କରିଥିଲେ । ଉଦ୍ଧାର ପରେ ସାପଟିକୁ ସୁରକ୍ଷିତ ଭାବେ ନିକଟସ୍ଥ ଲକ୍ଷାରୀ ଅଭୟାରଣ୍ୟ ଜଙ୍ଗଲରେ ଛଡ଼ାଯାଇଛି।