(ବଡ଼ ଖବର ବ୍ୟୁରୋ): ଟୋକିଓ ଅଲିମ୍ପିକ୍ସରେ ଜର୍ମାନୀ ହକି ଦଳକୁ ପରାସ୍ତ କରି ବ୍ରୋଞ୍ଜ ପଦକ ଜିତିଛନ୍ତି ଭାରତୀୟ ପୁରୁଷ ହକି ଦଳ । ୧୯୮୦ପର ଠାରୁ ଭାରତ ପ୍ରଥମ ଥର ପାଇଁ ଅଲିମ୍ପିକ୍ସରେ ପଦକ ଜିତିଛି, ଯାହାକୁ ନେଇ ଗର୍ବିତ ଭାରତ । ବ୍ରୋଞ୍ଜ ପଦକ ମ୍ୟାଚରେ ଭାରତ ଜର୍ମାନୀକୁ ୫-୪ ରେ ପରାସ୍ତ କରିଛି। ବର୍ତ୍ତମାନ ବିଶ୍ୱ ମାନ୍ୟତାରେ ତୃତୀୟ ସ୍ଥାନ ଅଧିକାର କରିଥିବା ଭାରତ ଏହି ମ୍ୟାଚରେ ଖରାପ ଆରମ୍ଭ କରିଥିଲା ଓ ମ୍ୟାଚର ପ୍ରଥମ ମିନିଟରେ ଜର୍ମାନୀ ଗୋଟିଏ ଗୋଲ୍ ସ୍କୋର କରି ୦-୧ ଅଗ୍ରଣୀ ହାସଲ କରିଥିଲା। ଜର୍ମାନୀ ପାଇଁ ତିମୁର ଓରୁଜ ଏହି ଗୋଲ ସ୍କୋର କରିଥିଲେ। ପଞ୍ଚମ ମିନିଟରେ ଭାରତ ପୁଣି ଫର୍ମକୁ ଫେରି ଆସି ସୁଯୋଗ ପାଇଲା । କିନ୍ତୁ ରୁପିନ୍ଦର ପାଲ ସିଂ ପେନାଲ୍ଟି କର୍ଣ୍ଣରକୁ ରୂପାନ୍ତର କରିବାରେ ବିଫଳ ହୋଇଥିଲେ।
ପ୍ରଥମ କ୍ୱାର୍ଟର ଶେଷ ହେବା ପରେ ଜର୍ମାନୀ ଭାରତଠାରୁ ୦-୧ଅଗ୍ରଣୀ ହାସଲ କରିଥିଲା। ତେବେ ଭାରତର ଗୋଲକିପର ଶ୍ରୀଜେଶ ଏହି କ୍ୱାର୍ଟରରେ କିଛି ଉଜ୍ଜଳ ପ୍ରତିରକ୍ଷା କରିଥିଲେ। ଦ୍ୱିତୀୟ କ୍ୱାର୍ଟର ଆରମ୍ଭରେ ଭାରତ ଏକ ଚମତ୍କାର ପ୍ରତ୍ୟାବର୍ତ୍ତନ କରିଥିଲା ଓ ୧୭ତମ ମିନିଟରେ ସିମରନଜୀତ ସିଂଙ୍କ ଚମତ୍କାର ଫିଲ୍ଡ ଗୋଲ ମ୍ୟାଚକୁ ୧-୧ ଡ୍ରରେ ପହଞ୍ଚାଇଥିଲା। ପରେ ଜର୍ମାନୀ ଭାରତୀୟ ପ୍ରତିରକ୍ଷା ଉପରେ ଚାପ ପକାଇବା ଆରମ୍ଭ କରି ଦୁଇ ମିନିଟ୍ ବ୍ୟବଧାନରେ ଦୁଇଟି ଗୋଲ୍ ସ୍କୋର କରି ଭାରତକୁ ୧-୩-୧ରେ ଆଗୁଆ କରିଥିଲେ ।
ନିକ୍ଲାସ୍ ୱେଲେନ ପ୍ରଥମେ ଜର୍ମାନୀ ପାଇଁ ଏକ ଜବରଦସ୍ତ ଫିଲ୍ଡ ଗୋଲ୍ ସ୍କୋର କରିଥିଲେ ଓ ପରେ ବେନେଡିକ୍ଟ ଫାର୍କ ଏହି ଗୋଲ୍ ସ୍କୋର କରିଥିଲେ। ତୃତୀୟ କ୍ୱାର୍ଟରରେ ଭାରତ ମ୍ୟାଚକୁ ସମ୍ପୂର୍ଣ୍ଣ ଭାବେ ପ୍ରାଧାନ୍ୟ ଦେଇ ଜର୍ମାନୀ ଉପରେ ଅଗ୍ରଣୀ ହାସଲ କରିଥିଲା। ଏହି କ୍ୱାର୍ଟରରେ ଭାରତ ଦୁଇଟି ଗୋଲ ସ୍କୋର କରିଥିଲା। ୩୧ ମିନିଟରେ ରୁପିନ୍ଦର ପାଲ ସିଂ ଭାରତ ପାଇଁ ଚତୁର୍ଥ ଗୋଲ ସ୍କୋର କରିଥିଲେ। ପେନାଲ୍ଟି ଷ୍ଟ୍ରୋକରେ ରୁପିନ୍ଦର ପାଲ ସିଂ ଏହି ଗୋଲ ସ୍କୋର କରି ଦଳକୁ ୪-୩ରେ ଆଗରେ ରଖିଥିଲେ। ତିନି ମିନିଟ ପରେ ଅର୍ଥାତ୍ ଖେଳର ୩୪ ତମ ମିନିଟରେ, ସିମରଜିତ ସିଂ ଏକ ଚମତ୍କାର ଫିଲ୍ଡ ଗୋଲ ସ୍କୋର କରି ଭାରତକୁ ଏହି ମ୍ୟାଚରେ ୫-୩ରେ ଅଗ୍ରଣୀ କରାଇଥିଲେ ।
ଚତୁର୍ଥ କ୍ୱାର୍ଟର ଆରମ୍ଭରେ ଜର୍ମାନୀ ଏକ ପେନାଲ୍ଟି କର୍ଣ୍ଣରରୁ ଚତୁର୍ଥ ଗୋଲ ସ୍କୋର କରିଥିଲା। ଅନ୍ତିମ କ୍ୱାର୍ଟରରେ ଭାରତୀୟ ଦଳ ୫-୪ରେ ଆଗୁଆ ରହିଥିଲା । ସପ୍ତମ ମିନିଟରେ ତାଙ୍କର ଷଷ୍ଠ ଗୋଲ ସ୍କୋର କରିବାକୁ ମନଦୀପ ସିଂଙ୍କର ଏକ ଭଲ ସୁଯୋଗ ଥିଲା କିନ୍ତୁ ସେ ତାହା କରିବାରେ ବିଫଳ ହୋଇଥିଲେ। ୧୯୮୦ ମସ୍କୋରେ ଅଲିମ୍ପିକ୍ସରେ ଭାରତ ହକିରେ ଶେଷ ପଦକ ଜିତିଥିଲା । ସେହି ବର୍ଷ ଅଧିନାୟକ ଭାସୁଦେବନ ଭାସ୍କରନଙ୍କ ନେତୃତ୍ୱରେ ଭାରତ ସ୍ୱର୍ଣ୍ଣ ପଦକ ଜିତିଥିଲା। ଏହା ପରଠାରୁ ଭାରତର ସର୍ବୋତ୍ତମ ପ୍ରଦର୍ଶନ ୧୯୮୪ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ ଆସିଥିଲା । ଯେଉଁଠାରେ ପୁରୁଷ ହକି ଦଳ ପଞ୍ଚମ ସ୍ଥାନ ହାସଲ କରିଥିଲେ । ବର୍ତ୍ତମାନ ଏହି ବିଜୟ ସହିତ, ୪୧ବର୍ଷ ପରେ ଭାରତ ଅଲିମ୍ପିକ୍ ହକିରେ ପଦକ ମରୁଡ଼ିକୁ ସମାପ୍ତ କରିଛି ।
