ପୁଣି ବଢିଲା ଶୀତ
ଭୁବନେଶ୍ୱର (ବଡ଼ ଖବର ବ୍ୟୁରୋ): ମାତ୍ର ଦୁଇ ଦିନର ଆଶ୍ବସ୍ତି ପରେ ପୁଣି ବଢିଲା ଶୀତ। ମେଘାଚ୍ଛନ୍ନ ବାଦଲ ହଟିବା ପରେ ରାଜ୍ୟର ବିଭିନ୍ନ ସ୍ଥାନରେ ଖସିଲା ରାତି ତାପମାତ୍ରା । ଆକାଶ ମେଘାଚ୍ଛନ୍ନ ରହିଥିବାରୁ ସର୍ବନିମ୍ନ ତାପମାତ୍ରାରେ ସାମାନ୍ୟ ବୃଦ୍ଧି ଘଟିଥିଲା । ଅଧିକାଂଶ ସ୍ଥାନରେ ରାତିର ତାପମାତ୍ରା ୫ରୁ ୭ ଡିଗ୍ରି ପର୍ୟ୍ୟନ୍ତ ବଢ଼ିଥିଲା । ଏବେ ସପ୍ତାହ ପର୍ୟ୍ୟନ୍ତ ପ୍ରବଳ ଶୀତ ନେଇ ଆକଳନ କରିଛି ଆଂଚଳିକ ପାଣିପାଗ ବିଭାଗ । ଆଜି ଓ ଆସନ୍ତାକାଲି ପାଇଁ ଅନୁଗୁଳ, ବୌଦ୍ଧ ଓ ଝାରସୁଗୁଡ଼ାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।
ସେହିପରି ୧୫ ତାରିଖ ପାଇଁ ୯ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ଆଗାମୀ ୪ରୁ ୫ ଦିନ ସର୍ବନିମ୍ନ ରାତି ତାପମାତ୍ରାରେ ବିଶେଷ କିଛି ପରିବର୍ତ୍ତନ ହେବ ନାହିଁ ବୋଲି ପୂର୍ବାନୁମାନ କରିଛି ଆଂଚଳିକ ପାଣିପାଗ କେନ୍ଦ୍ର । ରବିବାର ରାତିରେ ଜି.ଉଦୟଗିରିର ସର୍ବନିମ୍ନ ତାପମାତ୍ରା ୪.୮ ଡିଗ୍ରୀ ସେଲସିୟସ୍ ଥିବାବେଳେ ଫୁଲବାଣୀ ୬.୮, ଦାରିଙ୍ଗିବାଡ଼ି ୭, ଝାରସୁଗୁଡ଼ା ୭, ରାଉରକେଲା ୬.୭, ସୁନ୍ଦରଗଡ଼ ୯, କିରେଇ ୮.୮, ଅନୁଗୁଳ ୯.୬, ବୌଦ୍ଧ ୯.୮, ଚିପିଲିମା ୯.୪, ନବରଙ୍ଗପୁର ୯, ଭବାନୀପାଟଣା ୧୦, କେନ୍ଦୁଝର ୧୦, ବାରିପଦା ୧୧, ରାଣୀତାଲ ୧୦.୯, କଟକ ୧୧.୪, ଭୁବନେଶ୍ୱର ୧୨.୩, ଖୋର୍ଦ୍ଧା ୧୨ ଡିଗ୍ରୀ ଥିଲା ।
୧୩ ତାରିଖରେ ଉପକୂଳ ଓଡ଼ିଶାରେ ପାରଦ ୧ ଡିଗ୍ରୀ କମିବ । ୧୪ ତାରିଖରେ ପାରଦ ବେଶି ନିମ୍ନଗାମୀ ହେବା ସହ କଟକରେ ୧୦ ଡିଗ୍ରୀ ଓ ଭୁବନେଶ୍ୱରରେ ୧୧ ଡିଗ୍ରୀକୁ ଆସିପାରେ । ୧୫ରେ କଟକ ଓ ଭୁବନେଶ୍ୱର ସର୍ବନିମ୍ନ ତାପମାତ୍ରା ୧୦ ଡିଗ୍ରୀ ରହିପାରେ ।