ଖାଁ ଖାଁ ଲାଗିଲା ସୁନାବେଡାର ସୁନାଦେଇ ଯାତ୍ରା।

ନୂଆପଡା ,  (ବଡ଼ ଖବର ବ୍ୟୁରୋ):

ସମୁଦ୍ର ପତ୍ତନ ଠାରୁ ୩୨୦୦ ଫୁଟ ଉଚ୍ଚତାରେ ଓ ୬୦୦ ବର୍ଗ କିଲୋମିଟରରେ ଅବସ୍ଥିତ ନୂଆପଡାର ସୁନାବେଡା ଅଭୟାରଣ୍ୟ ଅଞ୍ଚଳ। ଚକୋଟିଆ, ଭୁଞ୍ଜିଆ ,ପହରିଆ ଆଦି ଜନଜାତିର ଲୋକମାନେ ଏଠାରେ ବସବାସ କରନ୍ତି। ସଂସ୍କୃତି ଓ ପରମ୍ପରାରେ ଧନୀ ଏହି ଜନଜାତି ଲୋକମାନଙ୍କର ଆରାଧ୍ୟା ଦେବୀ ହେଉଛନ୍ତି ମାଁ ସୁନାଦେଇ। ପ୍ରତ୍ୟେକ ବର୍ଷ ଆଶ୍ୱିନ ମାସ ପୂର୍ଣ୍ଣିମା ତିଥିରେ ମାଁ ସୁନାଦେଇଙ୍କ ଛତର ଯାତ୍ରା ଅନୁଷ୍ଠିତ ହୁଏ। ଅଞ୍ଚଳବାସୀଙ୍କ ବିଶ୍ୱାସ ଅଛି ଏହି ଦିନ ମାଁଙ୍କୁ ପୂଜାର୍ଚ୍ଚନା କରି ମନସ୍କାମନା କଲେ ତାହା ଅବଶ୍ୟ ପୂରଣ ହୁଏ। ଏହି ଦିନ ନୂଆପଡ଼ାର ଆଖପାଖ ଜିଲ୍ଲା ସମେତ ପଡୋଶୀ ଛତିଶଗଡ଼ରୁ ମଧ୍ୟ ଶ୍ରଦ୍ଧାଳୁ ମାନେ ମାଁଙ୍କ ଦର୍ଶନ ପାଇଁ ଆସିଥାନ୍ତି। ଏହି ଦିନ ସୁନାବେଡା ହୋଇପଡେ ଉତ୍ସବମୁଖର ମାତ୍ର ଚଳିତ ବର୍ଷ କରୋନା ମହାମାରୀ ଯୋଗୁଁ ସରକାର ଓ ଜିଲ୍ଲା ପ୍ରଶାସନର କଟକଣା ପାଇଁ ବହୁ ଶ୍ରଦ୍ଧାଳୁ ମାଁଙ୍କ ଦର୍ଶନ ପାଇଁ ଆସିପାରିନଥିଲେ। ଜିଲ୍ଲା ପ୍ରଶାସନର ସହଯୋଗରେ କରୋନା କଟକଣାର ନିୟମକୁ ମାନି ସୁନାଦେଇ ପରିଚାଳନା କମିଟି ମାଁ ସୁନାଦେଇଙ୍କ ନୀତି ନିୟମ ପ୍ରତି ବର୍ଷ ପରି ଏ ବର୍ଷ ମଧ୍ୟ ସଫଳତାର ସହିତ ସମ୍ପୂର୍ଣ୍ଣ କରିଛନ୍ତି। ଏ ବର୍ଷ ନା ଥିଲେ ହଜାର ହଜାର ଶ୍ରଦ୍ଧାଳୁ ନା ବସିଥିଲା ଦୋକାନ ବଜାର ନା ଶୁଭୁଥିଲା କୋଳାହଳ ତଥାପି ବି ଉପସ୍ଥିତ ଶ୍ରଦ୍ଧାଳୁ ଓ ପରିଚାଳନା କମିଟି ଅନ୍ୟ ବର୍ଷ ପରି ଏ ବର୍ଷ ବି ସମଭାବରେ ସୁରୁଖୁରୁରେ ମାଁଙ୍କ ନୀତି ନିୟମ ଓ ପୂଜାର୍ଚ୍ଚନା କରିଥିଲେ। ମାଁ ସୁନାଦେଇ ଆମକୁ ସହାୟ ହେବେ , କରୋନା ହାରିବ ଓ ଆସନ୍ତା ବର୍ଷ ପୁଣି ଧୁମ ଧାମରେ ପାଳନ ହେବ ସୁନାଦେଇ ଯାତ୍ରା ବୋଲି କହିଥିଲେ ମୁଖ୍ୟ ପୂଜକ ବିଶ୍ରାମ ଛତରିଆ ।