୧୬ ଜିଲ୍ଲାରୁ ୧୭୫ ଆକ୍ରାନ୍ତ ଚିହ୍ନଟ
ଭୁବନେଶ୍ୱର (ବଡ଼ ଖବର ବ୍ୟୁରୋ): ବର୍ଷା ଋତୁ ଆରମ୍ଭ ନ ହେଉଣୁ ଡରାଇଲାଣି ଡେଙ୍ଗୁ । ୧୬ ଜିଲ୍ଲାରୁ ୧୭୫ ଆକ୍ରାନ୍ତ ଚିହ୍ନଟ ହୋଇଛନ୍ତି । କେବଳ ଭୁବନେଶ୍ୱରରୁ ୮୦ରୁ ଅଧିକ ଆକ୍ରାନ୍ତ ଚିହ୍ନଟ ହୋଇଛନ୍ତି । ଡେଙ୍ଗୁର ହଟସ୍ପଟ ପାଲଟିଛି ରାଜଧାନୀର ସାଲିଆସାହି । ସାଲିଆସାହି ଅଞ୍ଚଳରୁ ଡେଙ୍ଗୁରେ ଆକ୍ରାନ୍ତ ହେଲେଣି ୨୦ ଜଣ। ପ୍ରଶାସନ ପକ୍ଷରୁ ପରିମଳ ନେଇ କୌଣସି ପଦକ୍ଷେପ ନିଆଯାଉ ନଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଦେଖାଦେଲାଣି ଅସନ୍ତୋଷ। ସେହିଭଳି କ୍ୟାପିଟାଲ ହସ୍ପିଟାଲକୁ ଏବେ ପ୍ରତିଦିନ ୪-୫ ଜଣ ଡେଙ୍ଗୁ ରୋଗୀ ଆସୁଥିବା କହିଛନ୍ତି ମେଡିକାଲ କର୍ତ୍ତୃପକ୍ଷ ।
ସେପଟେ ଡେଙ୍ଗୁ ମୁକାବିଲା ଲାଗି ରାଜ୍ୟ ସରକାର ସମ୍ପୂର୍ଣ୍ଣ ପ୍ରସ୍ତୁତ ଥିବା କହିଛି ସ୍ୱାସ୍ଥ୍ୟ ବିଭାଗ । ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି, ଡେଙ୍ଗୁ ପାଇଁ ସତର୍କତାମୂଳକ ପଦକ୍ଷେପ ନେବା ପାଇଁ ସବୁ ଜିଲ୍ଲାକୁ ଜାରି ହୋଇଛି ଏସ୍ଓପି । ଡେଙ୍ଗୁ ଚିକିତ୍ସା ଲାଗି ଡେଡିକେଟେଡ୍ ବେଡ୍ ସମେତ ପର୍ୟ୍ୟାପ୍ତ ଔଷଧ, ରକ୍ତ, ପ୍ଲାଟିଲେଟ୍ ମହଜୁଦ ରଖିବାକୁ ନିର୍ଦ୍ଦେଶ ଦିଆଯାଇଛି। ରାଜ୍ୟର ୪୦ଟି ସେଣ୍ଟିନେଲ ସାଇଟରେ ଏଲିସା ପଦ୍ଧତିରେ ଡେଙ୍ଗୁ ଟେଷ୍ଟ କରାଯିବା ସହ ଟେଷ୍ଟିଂ ବଢ଼ାଯାଇଛି ।