ସରକାରୀ ଶିକ୍ଷାନୁଷ୍ଠାନରେ କରୋନା, ୩ ପଜିଟିଭ

କରଞ୍ଜିଆ (ବଡ଼ ଖବର ବ୍ୟୁରୋ): ଦିନକୁ ଦିନ ଉଗ୍ରରୂପ ନେବାରେ ଲାଗିଛି କରୋନା । କରୋନା କବଳରେ ଏବେ ସାରା ଦେଶ । କରୋନା ଦ୍ୱିତୀୟ ଲହର ଏବେ ଭୟଙ୍କର ହେବାରେ ଲାଗିଛି । ଏବେ ରାଜ୍ୟର ବିଭିନ୍ନ ଜିଲ୍ଲାରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଲାଣି । ବିଭିନ୍ନ ଘରୋଇ ଶିକ୍ଷାନୁଷ୍ଠାନରେ କରୋନା ସଂକ୍ରମିତ ଚିହ୍ନଟ ହେବା ପରେ ଏବେ ସରକାରୀ ସ୍କୁଲରେ ମଧ୍ୟ ପଶିଲାଣି ଏହି ଭୂତାଣୁ ।

ବର୍ତ୍ତମାନ ସୁଦ୍ଧା କୌଣସି ସରକାରୀ ଶିକ୍ଷାନୁଷ୍ଠାନରେ କରୋନା ଆକ୍ରାନ୍ତ ନଥିବା ରାଜ୍ୟ ସରକାର ସୂଚନା ଦେଉଥିବାବେଳେ ଏବେ ସରକାରୀ ସ୍କୁଲରେ ଚିହ୍ନଟ ହେଲେଣି ସଂକ୍ରମିତ । ମୟୂରଭଞ୍ଜ ଜିଲ୍ଲା କରଞ୍ଜିଆ ବ୍ଲକ ତାଟୋ ବାଳିକା ଉଚ୍ଚ ବିଦ୍ୟାଳୟରେ କରୋନା ସଂକ୍ରମିତ ଚିହ୍ନଟ ହୋଇଛନ୍ତି ।

ବିଦ୍ୟାଳୟର ଦୁଇ ଅନ୍ତେବାସୀଙ୍କ ସହ ଜଣେ ମେଟ୍ରନ କରୋନା ପଜିଟିଭ ଚିହ୍ନଟ ହୋଇଛନ୍ତି । ବିଦ୍ୟାଳୟକୁ ସମ୍ପୂର୍ଣ୍ଣ ସାନିଟାଇଜ କରିବା ସହ ୩ ସଂକ୍ରମିତଙ୍କୁ ବିଦ୍ୟାଳୟ ପରିସରରେ ଆଇସୋଲେସନରେ ରଖାଯାଇଛି ବୋଲି ଜିଲ୍ଲା ମଙ୍ଗଳ ଅଧିକାରୀ ଚିତ୍ତରଞ୍ଜନ ମହାପାତ୍ର ସୂଚନା ଦେଇଛନ୍ତି ।