ଭୂତ ଖାଇଗଲା ଲକ୍ଷାଧିକ ଟଙ୍କାର ରାସନ

ଅସ୍ତରଙ୍ଗ (ବଡ଼ ଖବର ବ୍ୟୁରୋ) : କୋଭିଡ ମହାମାରୀରେ ବି ଚଳୁ କରିନେଲେ ପିଡିଏସ ଚାଉଳ। ଆର. ଟି. ଆଇ ତଥ୍ୟରୁ ହେଲା ମହାଖୁଲାସା। ଏଭଳି ସାଙ୍ଘାତିକ ଘଟଣା ଘଟିଛି ପୁରୀ ଜିଲ୍ଲା ଅସ୍ତରଙ୍ଗ ବ୍ଲକରେ I  ଆର. ଟି. ଆଇ ତଥ୍ୟ ଓ ବ୍ଲକ ଯୋଗାଣ ବିଭାଗର ତଥ୍ୟରେ ରହୁନି ତାଳମେଳ। ଡିଲର ଓ ଯୋଗାଣ ବିଭାଗ ମଧୁଚନ୍ଦ୍ରିକାରେ ଏହି ଲୁଟ ହୋଇଥିବା ଅଭିଯୋଗ ଆଣିଛନ୍ତି ସୂଚନା ଅଧିକାର କର୍ମୀ ଯାକେଶ ପଢିଆରୀ।

ଜିଲ୍ଲାପାଳ ଓ ବ୍ଲକ ଅଧିକାରୀଙ୍କ ତଥ୍ୟରେ ରହୁନି ତାଳମେଳ। ଆର. ଟି. ଆଇ ତଥ୍ୟରେ ବ୍ଲକ ଯୋଗାଣ ବିଭାଗରେ ରହିଛନ୍ତି ୧୭ ହଜାର ୯୨୫ ଜଣ ହିତାଧିକାରୀ। ଜାତୀୟ କାର୍ଡଧାରୀ ୧୭୨୦୩ ହୋଇଥିବା ବେଳେ ରାଜ୍ୟ କାର୍ଡଧାରୀ ୭୨୨ ରହିଛନ୍ତି। ସେହିପରି ଜିଲ୍ଲାପାଳଙ୍କ ରିପୋର୍ଟ ହିସାବରେ ଜାତୀୟ କାର୍ଡଧାରୀ ୧୭୨୬୨ ଜଣ ଥିବା ବେଳେ, ରାଜ୍ୟ କାର୍ଡଧାରୀ ହେଉଛନ୍ତି ୨୬୪ ଜଣ। ଏମିତିକି ବ୍ଲକରେ ମୋଟ ୧୭୫୨୬ ଜଣ ହିତାଧିକାରୀ ଅଛନ୍ତି। ତେବେ ବ୍ଲକ ପ୍ରଶାସନ ପାଖରେ ୩୯୯ ଜଣ ହିତାଧିକାରୀ କିଏ ? କିଏ ଉଠାଉଛି ଏହି ରାସନ ? ତାହାକୁ ନେଇ ପ୍ରଶ୍ନ ଉଠିଛି।

ଗୋଟିଏ ପଟେ ପ୍ରକୃତ ହିତାଧିକାରୀ ଯୋଜନାରୁ ବଞ୍ଚିତ ହେଉଥିବା ବେଳେ କିନ୍ତୁ ୩୯୯ ଜଣ ଅଧିକ ହିତାଧିକାରୀ ଅଛନ୍ତି। ଅସ୍ତରଙ୍ଗ ବ୍ଲକ ରେ ପି. ଡି. ଏସ. ଘୋଟଲାର ତଦନ୍ତ ସରିନଥିବାବେଳେ ରାସନ ଘୋଟଲା ପୁଣି ସାମ୍ନାକୁ ଆସିଛି।